Home ՀԱՅԱՍՏԱՆԱՐՑԱԽ Պաքուն Չէ Մեկնաբանած Ստեփանակերտի Մէջ Ռուսաստանի Հիւպատոսութիւն Բանալու Յայտարարութիւնը

Պաքուն Չէ Մեկնաբանած Ստեփանակերտի Մէջ Ռուսաստանի Հիւպատոսութիւն Բանալու Յայտարարութիւնը

by MassisPost

Պաքուն չէ մեկնաբանած Ստեփանակերտի մէջ Ռուսաստանի հիւպատոսութիւն բանալու հնարաւորութեան մասին Քարասինի յայտարարութիւնը, կը գրէ «Թուրան» գործակալութիւնը։

Ատրպէյճանական լրատուամիջոցը կը նշէ, որ ռուսաստանցի պաշտօնեայի յայտարարութեան վերաբերեալ մեկնաբանութեան խնդրանքով դիմած է Ատրպէյճանի ԱԳՆ, սակայն գերատեսչութիւնը մերժած է արձագանգել։

ՌԴ խորհուրդի Արտաքին յարաբերութիւններու յանձնաժողովի նախագահ Կրիկորի Քարասինը Մոսկուայի մէջ ատրպէյճանցի խորհրդարանականներու հետ հանդիպման ժամանակ յայտնած է, որ Ռուսաստանը մտադիր է Ստեփանակերտի մէջ Գլխաւոր հիւպատոսութիւն բանալ եւ այդ հարցով կ’ակնկալէ Ատրպէյճանի աջակցութիւնը։ Ընդ որում՝ ռուսաստանցի պաշտօնեան իր խօսքին մէջ օգտագործած է Լեռնային Ղարաբաղի մայրաքաղաքի ատրպէյճանական անուանումը՝ Խանքենտի։

«Իտէալական պիտի ըլլար, եթէ հիւպատոսութիւնը բացուէր 2024 թուականին»,- նշած է Քարասինը։

Ատրպէյճանի Միլլի մեճլիսի պատգամաւոր, իշխանութիւններուն քարոզչական խօսափողը համարուող Ռասիմ Մուսապեքովի գնահատմամբ՝ Մոսկուան այդ քայլով կը փափաքի վերականգնել ներկայութիւնը Ղարաբաղի մէջ։

«Ռուսական խաղաղապահ զօրախումբի դուրսբերումէն յետոյ Խանքենտիի եւ անոր շրջակայքին մէջ ռուս զինուորականներ կամ անոնց ընտանիքներու անդամներ չկան։ Այստեղ մուտքը սահմանափակ է եւ կը կարգաւորուի յատուկ ձեւով։ Տեղահանուած ատրպէյճանցիները նոր սկսած են վերադառնալ։ Այստեղ ռուսական ձեռնարկութիւններ չկան, օդային ու երկաթուղային հաղորդակցութիւնները չեն վերականգնուած։ Անհասկնալի է, թէ ինչ հիւպատոսական գործունէութիւն մտադիր է այստեղ իրականացնել ՌԴ ԱԳՆ-ն»,- Ֆէյսպուքի մէջ գրած էր ատրպէյճանցի պատգամաւոր Մուսապեքովը։

Աւարտած համարելով խաղաղապահ առաքելութիւնը՝ 2024-ի Ապրիլի կէսերէն մեկնարկեց ռուսաստանի խաղաղապահ զօրակազմը նախատեսուած ժամկէտէն շուտ Ղարաբաղէն դուրս բերելու գործընթացը։

 

Հարակից Նյութեր

Leave a Comment