Home ԳԼԽԱՒՈՐ ԼՈՒՐԵՐ Հայաստանի Տնտեսական Աշխուժութեան Ցուցանիշը Չորս Ամսուան Մէջ Աճած Է 13,2 Տոկոսով

Հայաստանի Տնտեսական Աշխուժութեան Ցուցանիշը Չորս Ամսուան Մէջ Աճած Է 13,2 Տոկոսով

by MassisPost

Հայաստանի տնտեսական աշխուժութեան ցուցանիշը 2024 թուականի Յունուար-Ապրիլ ամիսներուն 13,2 տոկոսով աւելցած է նախորդ տարուան նոյն ժամանակահատուածի նկատմամբ:

Այս մասին կը փաստեն ՀՀ Վիճակագրական Կոմիտէի հրապարակած տուեալները:

Արդիւնաբերական արտադրանքի ծաւալը այս տարուայ Յունուար-Ապրիլին նախորդ տարուայ նոյն ժամանակահատուածի համեմատ աճած է 26,8 տոկոսով: Շինարարութեան ծաւալը 2024-ի չորս ամիսներուն աւելցած է 13,7 տոկոսով: Առեւտուրի շրջանառութեան մէջ Յունուար-Ապրիլին 2023-ի Յունուար-Ապրիլի նկատմամբ աւելացումը կազմած է 26,7 տոկոս: Նոյն ժամանակահատուածին մատուցուած ծառայութիւններու ծաւալւ աւելցած է 3,9 տոկոսով:

Այս տարուայ առաջին չորս ամիսներուն սպառողական գիներու ցուցակը նախորդ տարուայ նոյն ժամանակահատուածին համեմատ նուազած է 1,1 տոկոսով, իսկ արդիւնաբերական արտադրանքի գիներու ցուցակը աճած է 0,7 տոկոսով: Ելեկտրուժի արտադրութեան ծաւալներուն մէջ արձանագրուած է 0,4 տոկոս աճ:

Արտաքին առեւտրաշրջանառութեան ծաւալին մէջ այս տարուայ Յունուար-Ապրիլին արձանագրուած է զգալի աճ, նախորդ տարուայ նոյն ժամանակահատուածին համեմատ աճը 2.4 անգամ է: Ընդ որում՝ արտահանումը աւելցած է 2.8 անգամ, իսկ ներմուծումը՝ 2.1 անգամ:

Դրամի փոխարժէքը ԱՄՆ տոլարի նկատմամբ Յունուար-Ապրիլ ամիսներուն կազմած է 400,16 դրամ:

Հարակից Նյութեր

Leave a Comment