Հայաստանի արտաքին գործերու նախարար Արարատ Միրզոյեանը եւ ԱՄՆ կովկասեան բանակցութիւններու հարցերով աւագ խորհրդական, ԵԱՀԿ Մինսքի Խումբի ամերիկացի համանախագահ Լուիս Պոնօն քննարկած են տարածաշրջանային անվտանգային հարցեր:
Զրուցակիցները անդրադարձած են հայ-ատրպէյճանական յարաբերութիւններու կարգաւորման գործընթացին մէջ վերջին զարգացումներուն, այդ շարքին՝ խաղաղութեան պայմանագրի նախագիծին մէջ առանցքային հարցերու շուրջ մօտեցումներուն եւ անոնց համաձայնեցման ուղղութեամբ ջանքերուն: Միրզոյեան ընդգծած է երկու երկիրներուն կողմէ ամենաբարձր մակարդակով արտայայտուած՝ 1991թ. Ալմա-աթայի հռչակագրի հիման վրայ տարածքային ամբողջականութեան փոխադարձ ճանաչման յանձնառութեան հաւատարմութեան, պայմանագրին մէջ ամրագրման եւ հռչակագրի հիման վրայ սահմանազատման գործընթացի կարեւորութիւնը: Ընդգծուած են նաեւ Հայաստանի եւ Ատրպէյճանի միջեւ սահմանազատման ու սահմանային անվտանգութեան յանձնաժողովներու վերջին հանդիպումներու ժամանակ ձեռք բերուած պայմանաւորուածութիւնները:
Հայաստանի արտաքին գործերու նախարարը եւ ԱՄՆ պաշտօնեան միտքեր փոխանակած են տարածաշրջանային կապուղիներու ապաշրջափակման հարցերու շուրջ: Արարատ Միրզոյեանը ներկայացուցած է թեմային շուրջ վերջին քննարկումներն ու ՀՀ մօտեցումները, որոնք կը շարունակեն համահունչ ըլլալ հանրահռչակուած՝ ինքնիշխանութեան ու ազգային օրէնսդրութեան յարգման, հաւասարութեան ու փոխադարձութեան սկզբունքներուն:
Փոխվարչապետ Մհեր Գրիգորեանը եւս ընդունած է Լուիս Պոնօն:
ԱՄՆ պետական քարտուղար Պլինքըն իր հերթին յոյս յայտնած է, որ Երեւանն ու Պաքուն կը յաջողին համաձայնութեան հասնիլ խաղաղութեան պայմանագրի շուրջ։
