Պրիւքսէլի մէջ Հայաստանի դեսպան, ԵՄ-ի մէջ ՀՀ մշտական ներկայացուցիչ Տիգրան Բալայեանը հանդիպում ունեցած է Պելճիքայի մէջ կայանալիք շրջանային, դաշնային եւ եւրոպական ընտրութիւններուն առաջադրուած հայ թեկնածուներ Աննա Յովսէփեանի, Արմինէ Հարէեանի, Նիքոլիա Դաւիթեանի, Լիաննա Դաւթեանի եւ Գայիանէ Պերթրանի հետ:
Դեսպան Բալայեան թեկնածուներուն ներկայացուցած է Հայաստանի քաղաքական եւ ընկերային դրութիւնը, տարածաշրջանային քաղաքական մօտեցումները, անդրադարձած է բռնի տեղահանուած արցախահայութեան կարիքներու հասցէագրման ուղղուած ՀՀ կառավարութեան ծրագրերուն եւ Ատրպէյճանի հետ սահմանագծման գործընթացին:
Դեսպան Բալայեանի խօսքով` Պելճիքայի յառաջիկայ ընտրութիւններուն հայազգի պատգամաւորներու այսչափ ներկայանալի մասնակցութիւնը հայ համայնքի 100-ամեայ համարկման վառ արտացոլումն է, ինչ որ պէտք է տեսանելի եւ հնչեղ ըլլայ ամբողջ հայութեան շրջանակներուն մէջ:
Պատգամաւորի թեկնածուները իրենց հերթին պատմած են նախընտրական քարոզարշաւի մանրամասնութիւններուն եւ ընտրութիւններու հնարաւոր արդիւնքներուն մասին, իւրաքանչիւրը ներկայացուցած է իր կուսակցութեան հնարաւորութիւններն ու արձանագրած յաջողութիւնները: Թեկնածուները խոստացած են ընտրուելու պարագային Հայաստանին եւ Լեռնային Ղարաբաղին վերաբերող հարցերը մշտապէս պահել ուշադրութեան կեդրոնին եւ բարձրաձայնել նշեալ հարցերը բոլոր հնարաւոր հարթակներու վրայ:
Հանդիպման աւարտին դեսպան Տիգրան Բալայեան բոլորին յաջողութիւն մաղթած է:
