Վարչապետ Նիկոլ Փաշինեանի գլխաւորութեամբ տեղի ունեցած է խորհրդակցութիւն, որուն ընթացքին քննարկուած է Հայաստանի ժողովրդագրական ռազմավարութեան նախագիծը:
Որպէս նախորդ քննարկումներու լրացում՝ վարչապետը նշած է, որ այս ընթացքին բաւականին մեծ աշխատանք իրականացուած է եւ յոյս յայտնած է, որ այսօրուայ քննարկումներուն բերումով եզրակացութիւններ պիտի ըլլան: Նիկոլ Փաշինեան շեշտած է, որ որեւէ ռազմավարութիւն, այդ շարքին՝ ժողովրդագրութեան ռազմավարութիւնը չի կրնար գոյութիւն ունենալ դատարկութեան մէջ, այսինքն՝ ընդհանուր ծիրի մաս է: Վարչապետը պարզաբանած է, որ ժողովրդագրութիւնը, ըստ էութեան, կը բնորոշուի, բառարանային ձեւակերպմամբ, որպէս գիտութիւն բնակչութեան կամ ազգաբնակչութեան մասին, կ’առնչուի կեանքի եւ ապրելու հայեցակարգի հետ: Ըստ վարչապետին, սա կապ ունի վերջին շրջանին առաջարկուած քաղաքական քննարկման եւ բանավէճի հետ, որովհետեւ ժողովրդագրութեան ռազմավարութեան իրականացման արդիւնաւէտութիւնը քննարկելով կան բազմաթիւ կէտեր, որոնց վերաբերեալ վերաբերմունքը շատ յստակ է եւ դրական, բայց ամէն անգամ այդ կէտերուն հասնելով վստահութիւն չկայ, թէ անոնք որքանով իրատեսական են իրագործել եւ ինչ արդիւնքներու պիտի բերեն:
Վարչապետին խօսքով, ժողովրդագրական ռազմավարութիւնը եւ Հայաստանի ժողովրդագրութեան ընթացիկ իրադրութիւնները քննարկելով հաշուի չեն առնուիր շարք մը ակնյայտ գործօններ, մասնաւորապէս՝ ինչքան մարդ Հայաստանի Հանրապետութենէն արտագաղթած է միայն անոր համար, որ իր երեխան չյայտնուի խրամատին մէջ: Նիկոլ Փաշինեան նշած է, որ ոչ ոք ունի վիճակագրութիւն, թէ այս միխառնութեան առումով Հայաստանի Հանրապետութեան քանի քաղաքացի զրկուած է պատշաճ կրթութիւն ստանալու հնարաւորութենէն: Մինչդեռ, վարչապետին համոզմամբ, այդ մարդիկ հսկայական ներուժ ունէին, ամենատարբեր ոլորտներու մէջ կրնային շատ մեծ յաջողութիւններու հասնիլ: Ամփոփելով խօսքը՝ վարչապետը ընդգծած է՝ սա չի նշանակեր, որ պէտք է վերանայիլ ռազմավարութիւնը, այլ անհրաժեշտ է զայն դիտել այս լոյսի ներքոյ:
Մանրամասնութիւններ ներկայացուած են ժողովրդագրական ռազմավարութեան հիմնական ազդեցութիւններուն վերաբերեալ: Ըստ այդմ՝ այն պիտի յանգեցնէ բնակչութեան ծերացման աճի նուազման, բնակչութեան երիտասարդացման աճին, պիտի նուազեցնէ եկամուտ-սպառման տարբերութիւնը՝ աւագ սերունդը ներգրաւելով ընկերա-տնտեսական գործունէութեան մէջ, Հայաստանը էապէս պիտի խթանէ իր մարդկային ներուժի զարգացման ցուցակը՝ անով իսկ նուազեցնելով առաջատար երկիրներուն հետ առկայ տարբերութիւնը եւ այլն:
Վարչապետը պատասխանատուներուն յանձնարարած է պատրաստել քննարկումները ամփոփող զեկոյց, որուն հիման վրայ ռազմավարութեան նախագիծը պիտի ներկայացուի կառավարութեան հաստատման եւ պիտի նախանշուին հետագայ քայլերը:
