ԵԱՀԿ գործող նախագահ, Մալթայի արտաքին գործերու, եւրոպական հարցերու եւ առեւտուրի նախարար Իեն Պորճը Հայաստան կատարած այցի ընթացքին ընդգծած է կազմակերպութեան անսասան յանձնառութիւնը ԵԱՀԿ ամբողջ տարածաշրջանին մէջ կայուն խաղաղութեան խթանման:
Այս մասին ըսուած է ԵԱՀԿ-ի տարածած հաղորդագրութեան մէջ:
Կը նշուի, որ Հայաստանի բարձրաստիճան ղեկավարութեան հետ հանդիպումներուն ընթացքին Պորճ քննարկած է Հայաստանի եւ Ատրպէյճանի միջեւ շարունակուող խաղաղութեան գործընթացը:
«ԵԱՀԿ պատրաստ է աւելի աշխոյժ մասնակցութիւն ունենալու, աջակցելու մարդկային տառապանքները յաղթահարելու եւ մարդոց համար աւելի լաւ ապագայ ապահովելու ջանքերուն՝ շնորհիւ մեր հմտութիւններու եւ փորձագիտական գիտելիքներու լայն շրջանակին: Միաժամանակ, մենք պիտի շարունակենք աջակցիլ բոլոր այն նախաձեռնութիւններուն, որոնք դրական ազդակ կը ստեղծեն հակամարտութեան եւ անոր հետեւանքներու արդիւնաւէտ յաղթահարման համար»,- նշած է Պորճ:
Ան ողջունած է սահմանազատման գործին մէջ Հայաստանի եւ Ատրպէյճանի արձանագրած յառաջընթացը եւ կոչ ըրած շարունակել այդ գործընթացը։