«Տնտեսութեան եւ խաղաղութեան միջազգային հիմնարկ» (IEP) վերլուծական կեդրոնը հրապարակած է Դրական խաղաղութեան զեկոյցը (Positive Peace Report 2024), որուն մէջ ներառուած է 163 երկիր, այդ շարքին՝ Հայաստանը:
Ըստ զեկոյցի հեղինակներուն՝ դրական խաղաղութեան ամենամեծ բարելաւումները տեղի ունեցած են Ուզպեքիստանի, Հայաստանի, Կամպիայի, Թայուանի եւ Իրլանտայի մէջ:
Հայաստանը վարկանիշին մէջ կը զբաղեցնէ 54-րդ տեղը՝ 2.826 միաւորով: Մեր երկիրը իր դիրքը բարելաւած է 16 կէտով: Հայաստանը ներառուած է դրական խաղաղութեան բարձր վիճակի մէջ գտնուող երկիրներու ցանկին մէջ:
Տարածշրջանի երկիրներու շարքին Հայաստանը երկրորդն է՝ զիջելով Վրաստանին, որ 2.748 միաւորով 49-րդ տեղն է:
Այնուհետեւ կու գայ Թուրքիան (91-րդ հորիզոնական, 3.295 միաւոր, 28 կէտով անկում), որուն կը յաջորդեն Ռուսաստանը (93-րդ հորիզոնական, 3.319 միաւոր, 12 կէտով անկում), Ատրպէյճանը (104-րդ հորիզոնական, 3.428 միաւոր, 4 կէտով վերելք), Իրանը (124-րդ հորիզոնական, 3.628 միաւոր, 3 կէտով անկում):
