Ատրպէյճանական կողմին խնդրանքով` միւս շաբաթ Ուաշինկթընի մէջ նախատեսուող քննարկումներու հերթական փուլը կը յետաձգուի, կը տեղեկացնէ Հայաստանի արտաքին քաղաքական գերատեսչութիւնը:
Հանդիպման նոր ժամկէտներուն վերաբերեալ, ըստ Արտաքին Գործերու Նախարարութեան, հանրութիւնը պատշաճ կերպով պիտի տեղեկացուի:
Աւելի վաղ Արտաքին Գործերու Նախարարութիւնը հաղորդած էր, որ Հայաստանի եւ Ատրպէյճանի արտաքին գործերու նախարարներ Արարատ Միրզոյեանն ու Ճէյհուն Պայրամովը պիտի հանդիպին Յունիս 12-ին Ուաշինկթընի մէջ:
Ատրպէյճանական «Թուրան» գործակալութեան թղթակիցը, վկայակոչելով ամերիկեան դիւանագիտական գերատեսչութեան իր աղբիւրը, յայտնած էր, որ Միրզոյեան-Պայրամով հանդիպումը կրնայ յետաձգուիլ:
«Արարատ Միրզոյեանի եւ Ճէյհուն Պայրամովի հանդիպումը կրնայ տեղի ունենալ ոչ Յունիս 12-ին, ոչ ալ նոյնիսկ յաջորդ շաբաթ, ինչպէս կ’ենթադրուէր ի սկզբանէ», «Թուրան»ի փոխանցմամբ, ըսած է դիւանագիտական աղբիւրը, որ նաեւ յաւելել է․ «Խօսքը բացառապէս ժամանակացոյցի եւ լոկիսթիքայի մասին է»:
ԱՄՆ Պետական Քարտուղարութեան խօսնակի տեղակալ Վետանթ Փատելը յայտնած էր, որ «անհամբեր կը սպասեն Ուաշինկթընի մէջ բանակցութիւններու եւս մէկ փուլի հիւրընկալման»` շեշտելով, որ չի կրնար նշել հանդիպման որեւէ ժամանակացոյց ու ամսաթիւ. «Ես չեմ պատրաստուիր հաստատելու կամ որեւէ ներքին տեղեկատուութիւն տրամադրելու ժամանակացոյցի կամ հնարաւոր ամսաթիւերու հետ կապուած»:
