Երուսաղէմի մէջ` իսրայէլա-պաղեստինեան հակամարտութեան ամենաթէժ կէտով, անշարժ գոյքի աղմկայարոյց գործարքը խուճապի մատնած է տեղի պատմական հայ համայնքը․ բնակիչները ամիսներէ ի վեր կը փորձեն հասկնալ` արդեօք առեղծուածային ներդրողի պատճառով պիտի զրկուի՞ն իրենց տուներէն:
«Կովերու Պարտէզ» կալուածքի գործարքին մասին «AP»-ն (Associated Press) կը գրէ` շեշտելով, որ «հին քաղաքին մէջ գտնուող հայկական թաղամասին մօտ 25 տոկոսի հարիւրամեայ վարձակալական պայմանագրին շուրջ ծագած վէճը արդէն քաղաքներու պարիսպներէն դուրս տարածուած է»:
Գործարքին պատճառով Հայ առաքելական եկեղեցւոյ առաջնորդը վանքին մէջ մեկուսացած է, գործարքի ետին կանգնած քահանան ալ շնորհազրկուած է, փախուստի դիմած է` թաքնուելով Լոս Անճելեսի մէջ:
Երուսաղէմի հայերուն պատկանող հողատարածքներու վարձակալութեան մասին յայտնի դարձած է Ապրիլին` իսրայէլեան երկրաչափերու անակնկալ այցէն յետոյ: Պարզուած է, որ իսրայէլեան ծագման գործարար մը մտադիր է հայերու բնակարաններու եւ խանութներու կրաքարէ ամրոցը, ինչպէս նաեւ ինքնաշարժի կայանատեղին վերածել շքեղ պանդոկի:
Զայրոյթի, շփոթութեան, վտարման վտանգի լոյսին տակ Հայոց պատրիարքարանը, որ համայնքի ինչպէս կրօնական, այնպէս ալ քաղաքացիական գործերը տնօրինող մարմինն է, ի վերջոյ խոստովանած է, որ եկեղեցին հողամասին վերաբերող գործարք ստորագրած է:
Երուսաղէմի Հայոց պատրիարք Նուրհան Մանուկեան
Հայոց պատրիարք Նուրհան Մանուկեանը կը պնդէ, որ «ապօրինի եւ խարդախ» գործարքին ամբողջ պատասխանատուութիւնը կը կրէ կարգալոյծ եղած քահանան: Պատրիարքին հաւաստմամբ, այդ ամէնը տեղի ունեցած է իր մէջքի ետին:
Այս խոստովանութիւնն ալ աւելի բորբոքած է կիրքերը Հայկական թաղամասին մէջ. բնակիչները կը դատապարտեն գործարքը` տեղի ունեցածը գնահատելով սպառնալիք Երուսաղէմի մէջ համայնքի երկարամեայ ներկայութեան եւ կը պահանջեն չեղարկել զայն:
Յորդանան «մտահոգուած է», Պաղեստինը Հայոց եկեղեցին կը մեղադրէ
Հարեւան Յորդանանը, որ պատմական կապեր ունի Երուսաղէմի քրիստոնէական վայրերուն հետ, յայտարարած է, որ մտահոգուած է «Սուրբ քաղաքի ապագային համար»:
Պաղեստինցի պաշտօնեաները Հայոց պատրիարքը մեղադրած եւ յայտարարած են, որ նման քայլով Մանուկեանը օգնած է Իսրայէլի կառավարութեան:
Պաղեստինի եւ Իսրայէլի միջեւ կռուախնձոր համարուող Երուսաղէմի մէջ նմանօրինակ հողային գործարքներուն պաղեստինեան կողմը աւանդաբար կոշտ կ’արձագանգէ` մտավախութիւն ունենալով, որ Իսրայէլը այդկերպ քայլ առ քայլ կը փորձէ դուրս մղել Պաղեստինը Արեւելեան Երուսաղէմի ռազմավարական տարածքներէն:
«Ազատութիւն»
