Հայաստանի Անվտանգութեան Խորհուրդի քարտուղար Արմէն Գրիգորեանը յայտնած է, որ կան բազմաթիւ երկիրներ, որոնց հետ Հայաստանը աշխոյժ քննարկումներ կ’ունենայ զէնք գնելու հարցով:
Հանրային հեռուստաընկերութեան տուած հարցազրոյցին ընթացքին Արմէն Գրիգորեան ընդգծած է, որ որոշ պարագաներու արդէն արդիւնքներ կան, որոշ երկիրներու հետ ալ բանակցութիւնները կը շարունակուին:
Գրիգորեան ընդգծած է, որ Հայաստանը հաշուի կ’առնէ այն իրողութիւնը, որ Ռուսիան Ուքրանիոյ հետ պատերազմը սպասարկելու խնդիր ունի եւ անոր կարողութիւնները չեն բաւարարեր, որպէսզի նաեւ զէնքի արտահանում իրականացնէ: «Այս ամէնը հաշուի առնելով` Հայաստանը գնացել է այլ աղբիւրներ փնտռելու ճանապարհով», նշած է Գրիգորեան:
Հայաստանի Անվտանգութեան Խորհուրդի քարտուղարը նաեւ նշած է, որ Հաւաքական Անվտանգութեան Պայմանագրի Կազմակերպութեան անդամ ըլլալը այս պահին չի սահմանափակեր Հայաստանի համագործակցութիւնը տարբեր երկիրներու հետ` չնայած նախապէս որոշակի սահմանափակումներ եղած են: «Մենք աշխոյժ աշխատում ենք նաեւ մեր արեւմտեան գործընկերների հետ անվտանգութեան ոլորտում մեր համագործակցութիւնն ամրապնդելու համար եւ շարունակելու ենք այս աշխատանքը», ըսած է Գրիգորեան: