Ատրպէյճանի նախագահ Իլհամ Ալիեւ, ընդունելով իր երկրին մէջ Հնդկաստանի նորանշանակ դեսպան Շրիտհարան Մատյուսուտհանանի հաւատարմագրերը, իր ելոյթին մէջ անդրադարձած է նաեւ հայ-ատրպէյճանական յարաբերութիւններու կարգաւորման գործընթացին:
Ատրպէյճանի առաջնորդը կրկին պնդած է, որ Հայաստանի մէջ կը գործեն «ռեւանշիստական ուժեր, որոնք տակաւին տարածքային յաւակնութիւններ ունին»:
«Խօսելով այն մասին, որ Հայաստանի սրընթաց սպառազինուիլը նոր սպառնալիքներ կը ստեղծէ, պետութեան ղեկավարը նշած է, որ եթէ Հայաստանը իսկապէս խաղաղութիւն կ’ուզէ Ատրպէյճանի հետ, ապա ինչո՞ւ պէտք է հարիւր միլիոնաւոր տոլարներու զէնք գնէ», կ’ըսուի Ատպէյճանի նախագահի Մամլոյ ծառայութեան հաղորդագրութեան մէջ:
Ալիեւ պնդած է, որ Հայաստանի այդ քաղաքականութիւնը «կրնայ յանգեցնել տարածաշրջանի համար նոր սպառնալիքներու»:
44-օրեայ պատերազմէն յետոյ խաղաղութեան համաձայնագրի ստորագրման անհրաժեշտութիւնը պնդող Ատրպէյճանի նախագահը բազմիցս յայտարարած է, որ Պաքուն կը շարունակէ հսկայական գումարներ ծախսել բանակին վրայ:
«Ինչո՞ւ, որովհետեւ մենք պէտք է միշտ պատրաստ ըլլանք: Կը մեծնան սպառնալիքները, կը մեծնայ վտանգը, եւ մենք միշտ պէտք է ի վիճակի ըլլանք յաղթահարելու որեւէ սպառնալիք», անցած օրերուն իր ելոյթներէն մէկուն ընթացքին կը պնդէր Իլհամ Ալիեւ: