ՀՀ վարչապետ Նիկոլ Փաշինեանի մասնակցութիւնը Երկրորդ Աշխարհամարտին յաղթանակի մոսկովեան ռազմական շքերթին պայմանաւորուած է Հայաստանի անվտանգութեան մարտահրաւէրները կառավարելու խնդիրով, կը կարծէ քաղաքական մեկնաբան Յակոբ Բադալեանը:
Այս միջոցառումին ԱՊՀ երկիրներու առաջնորդներուն մասնակցութիւնը յարուցած է Ուքրանիոյ իշխանութիւններուն վրդովմունքը:
«Հայաստանը գտնւում է շատ բարդ մարտահրաւէրների առաջ եւ Հայաստանի համար արդարացուած է այդ մարտահրաւէրների հարցում էական նշանակութիւն ունեցող բոլոր դերակատարների հետ աշխատանքը, այդ թւում` նաեւ Մոսկուայի հետ», ըսաւ Բադալեանը:
45 վայրկեան տեւած ռազմական շքերթին կը մասնակցէին նաեւ Ղազախիստանի, Ղրղըզիստանի, Տաճիկիստանի, Պելառուսիոյ, Թուրքմէնիստանի եւ Ուզպեքիստանի ղեկավարները:
Յատուկ յայտարարութեամբ Ուքրանիոյ Արտաքին Գործերու Նախարարութիւնը դատապարտեց առաջնորդներուն մասնակութիւնը միջոցառման` նշելով, որ «պատերազմական յանցագործի հետ նշուած օտարերկրեայ պետութիւններու ղեկավարներուն մասնակցութիւնը» «անբարոյական եւ ոչ-բարեկամական քայլ է Ուքրանիոյ նկատմամբ»:
Պաշտօնական Քիեւը կը պնդէ, որ ռազմական յանցագործութիւններուն համար միջազգային արդարադատութեան կողմէ հետախուզուող Փութինը այդ միջոցառման ընթացքին ելոյթ ունենալով «արդարացուցած է ուքրանացիներուն սպանութիւնը, ուքրանական քաղաքներու եւ գիւղերու աւերումը, ուքրանացի երեխաներուն առեւանգումը»:
«Բնականաբար, մենք պէտք է առաջնորդուենք մեր անհրաժեշտութիւններից ելնելով եւ ոչ թէ ելնելով ուքրանական պատկերացումներից», ըսաւ Բադալեան: