Ատրպէյճանի իշխանութիւնները կրկին առաջարկած են «Ղարաբաղի հայ համայնքի ներկայացուցիչներուն» հետ Պաքուի մէջ հանդիպում կայացնել` Ապրիլի առաջին շաբթուան ընթացքին:
«Ատրպէյճանի նախագահին աշխատակազմը, որպէս շարունակութիւն Մարտ 1-ին Խոճալու {Իւանեան} քաղաքին մէջ կայացած հանդիպման եւ Մարտ 13-ի հրաւէրին, եւս մէկ անգամ կը հրաւիրէ Ղարաբաղի հայ համայնքի ներկայացուցիչները Ապրիլի առաջին շաբթուան ընթացքին Պաքուի մէջ հանդիպում կայացնել` վերահամարկման, ինչպէս նաեւ Ղարաբաղի մէջ ենթակառուցուածքային նախագիծերու իրականացման հարցերը քննարկելու համար», ըսուած է Ատրպէյճանի նախագահի աշխատակազմի հաղորդագրութեան մէջ:
Ստեփանակերտի ու Պաքուի ներկայացուցիչներուն միջեւ երկու հանդիպում տեղի ունեցած է, առաջինը` Փետրուարին, երկրորդը` Մարտի սկիզբը: Մարտ 13-ին Ատրպէյճանի իշխանութիւնները արդէն Արցախի ներկայացուցիչները հրաւիրեցին Պաքու, ինչպէս կը նշուէր հաղորդագրութեան մէջ` «վերահամարկման, ինչպէս նաեւ Ղարաբաղի մէջ ենթակառուցուածքային ծրագիրներու իրականացման հարցը քննարկելու»: Պաշտօնական Ստեփանակերտը մերժեց այս առաջարկն ու նաեւ բացառեց արցախցիներու «վերահամարկումը» Ատրպէյճանի կազմին մէջ:
Անցեալ շաբաթ Արցախի իշխանութիւնները յայտարարեցին, որ պատրաստ են մարդասիրական հարցերու քննարկման համար հերթական անգամ հանդիպելու ատրպէյճանական կողմին հետ, միաժամանակ վերահաստատեցին, որ լիարժէք բանակցութիւնները հնարաւոր են միջազգային ձեւաչափով:
