Սպիտակ Տան մէջ կայացած ճեպազրոյցի ընթացքին ԱՄՆ Ազգային Անվտանգութեան Խորհուրդի ներկայացուցիչ Ճոն Քըրպին Հայաստանին եւ Ատրպէյճանին կոչ ըրած է քայլերու ձեռնարկելու իրավիճակը ամամագլցողական դարձնելու համար:
«Բոլոր կողմերուն կոչ կ’ընենք թուլացնելու լարուածութիւնը: Մենք չենք փափաքիր տեսնել որեւէ բռնութիւն եւ կը փափաքինք տեսնել, որ բոլոր կողմերը կը ձեռնարկեն համապատասխան քայլերու` լարուածութիւնը թուլացնելու եւ բռնութիւնը դադրեցնելու համար», ըսած է Քըրպին ի պատասխան արգելափակուած Լաչինի միջանցքին վերաբերեալ հարցումի:
Հարցին հեղինակը, յիշեցնելով, որ լրացած է Լաչինի միջանցքի արգելափակման 100-րդ օրը, հետաքրքրուած էր հակամարտութեան առնչութեամբ ԱՄՆ-ի դիրքորոշմամբ, ինչպէս նաեւ` թէ կը մտահոգէ՞ արդեօք պաշտօնական Ուաշինկթընին «Ղարաբաղի տարածաշրջանին մէջ 2 հազար ռուս զինուորներու ներկայութիւնը»:
Նոյն օրը, յիշեցնենք, Միացեալ Նահանգներու պետական քարտուղարը զանգահարած է Ատրպէյճանի նախագահին` կարեւորելով Լաչինի միջանցքին վերաբացումը եւ Հայաստանի ու Ատրպէյճանի միջեւ խաղաղ գործընթացի շարունակականութիւնը:
Ալիեւ Փաստացի Կը Մերժէ Արցախի Շրջափակման Վերջ Տալու ԱՄՆ-ի Կոչը
Ատրպէյճանի նախագահը Միացեալ Նահանգներու պետական քարտուղարին հետ հեռախօսազրոյցին ընթացքին դարձեալ ընդգծած է Լաչինի միջանցքին անցակէտ տեղադրելու անհրաժեշտութիւնը` պատճառաբանելով, թէ հայկական կողմը կը շարունակէ ռազմական փոխադրումները Ղարաբաղ:
Իլհամ Ալիեւ ըսած է, որ պատրաստ է մօտ ապագային ստորագրելու խաղաղութեան համաձայնագիրը, որու բնագիրը վերջին առաջարկութիւններով եւ փոփոխութիւններով արդէն ներկայացուած է հայկական կողմին:
Պետական քարտուղարութիւնը կը հաղորդէ, որ Պլինքընը զանգահարած է Ալիեւին:
Ըստ հաղորդագրութեան` պետական քարտուղարը առաջարկած է ԱՄՆ-ի շարունակական աջակցութիւնը Հայաստանի հետ երկկողմ խաղաղ քննարկումներուն նպաստելու գործին մէջ, ընդգծած է, որ չկայ ռազմական լուծում, եւ կարեւորած է Լաչինի միջանցքին վերաբացումը:
Կարեւորելով կողմերուն միջեւ ուղիղ բանակցութիւնները` Էնթընի Պլինքընը Թուիթերով գրած է, որ Ալիեւի հետ զրոյցին իր աջակցութիւնը յայտնած է Հայաստանի հետ կայուն խաղաղութեան եւ Ուաշինկթընի պատարաստակամութիւնը` աջակցելու այդ ջանքերուն:
Նախօրէին ալ պետական քարտուղարը զանգահարած էր Հայաստանի վարչապետին: