Ստեփանակերտէն կը մերժեն վերահամարկման շուրջ Պաքուի մէջ քննարկումներ կատարելու Ատրպէյճանի իշխանութիւններուն առաջարկը: Ատրպէյճանի իշխանութիւնները Արցախի ներկայացուցիչները հրաւիրած էին Պաքու` վերահամարկման շուրջ հերթական քննարկումներ կատարելու համար:
«Ատրպէյճանի նախագահին վարչակազմը երկրորդ հանդիպման կը հրաւիրէ Ղարաբաղի հայ համայնքի ներկայացուցիչները` շարունակելու շփումները վերահամարկման, ինչպէս նաեւ Ղարաբաղի մէջ ենթակառուցուածքային ծրագիրներու իրականացման հարցը քննարկելու համար: Կ’առաջարկուի յառաջիկայ օրերուն հանդիպում կատարել Պաքու քաղաքին մէջ», ըսուած է նախագահ Ալիեւի վարչակազմին տարածած պաշտօնական հաղորդագրութեան մէջ:
Թէ ինչո՞ւ հանդիպման վայր ընտրուած է Պաքուն, ատրպէյճանական կողմը չէ մանրամասնած:
Թէեւ Արցախի նախագահին գրասենեակը պաշտօնական որեւէ յայտարարութիւն չըրաւ, բայց խորհրդարանի Պաշտպանութեան եւ Անվտանգութեան Յանձնաժողովի նախագահ Սէյրան Հայրապետեան «Ազատութեան» փոխանցեց, որ կը բացառեն Պաքուի առաջարկին ընդունումը: Արցախի անկախութիւնը այլընտրանք չունի, իսկ հանդիպման պատրաստ են, եթէ Ատրպէյճանի նախագահ Իլհամ Ալիեւը Արցախի նախագահ Արայիկ Յարութիւնեանին հանդիպման հրաւիրէ 3-րդ երկիր` Արցախի ինքնորոշման հարցը քննարկելու օրակարգով:
«Հարցադրումը միանգամից մերժման ենթակայ է` համարկման, վերահամարկման: Ինչի մասին է խօսք գնում, զէնքը ձեռքներին մեր վրայ պահած համարկում են պարտադրում, չկայ այդպիսի եզրոյթ: Մենք կարող ենք ոչ թէ բանակցել` վերահամարկուելու կամ համարկուելու, ինչպէս իրենք են ասում, այլ մենք պէտք է բանակցենք մեր ինքնորոշման ճանաչման եւ միւս հարցերով որպէս հաւասարը հաւասարի հետ», ըսաւ Հայրապետեան:
Սէյրան Հայրապետեան տեղեկացուց, որ Արցախի խորհրդարանական ուժերը յայտարարութիւն պիտի տարածեն` իրենց տեսակէտը ներկայացնելով Պաքուի առաջարկին շուրջ: