Ստեփանակերտը կը յայտարարէ, որ Պաքուի ներկայացուցիչներուն հետ նախօրէին տեղի ունեցած հանդիպման Արցախի կարգավիճակին վերաբերող հարցեր չեն քննարկուած, եւ որ նման ձեւաչափով շփումները չեն կրնար փոխարինել լիարժէք խաղաղ բանակցութիւնները:
Հակամարտութեան կարգաւորման համար անհրաժեշտ է վերականգնել «միջազգային միջնորդական ձեւաչափը», յայտարարած է Արցախի Արտաքին Գործերու Նախարարութիւնը:
Թէեւ կողմերուն միջեւ նախապէս ալ շփումներ եղած են, սակայն Պաքուն հնչեղութիւն տուաւ հանդիպման` պնդելով, որ քննարկած են «Ատրպէյճանի Ղարաբաղի շրջանին մէջ ապրող հայերը Ատրպէյճանի մէջ համարկելու հարցը` երկրի Սահմանադրութեան ու օրէնքներուն համապատասխան»: Առաջին անգամ նաեւ յայտարարուեցաւ, որ Պաքուն Ղարաբաղի մէջ ապրող հայերուն հետ շփումներու պատասխանատու նշանակած է` Միլի մեճլիսի պատգամաւոր Ռամին Մամետովը, որ բանակցութիւններէն յետոյ վստահեցուցած է, որ երկխօսութիւնը կայացած է:
Արցախի ներկայացուցիչներուն հետ հանդիպումէն յետոյ Մամետով նաեւ յայտարարծ է, որ իր հիմնական նպատակն է արագացնել Ղարաբաղի մէջ ապրող հայերու վերահամարկումը Ատրպէյճանին: Ատրպէյճանի բանագնացը նաեւ շեշտած է, որ նախօրէի ձեւաչափով բանակցութիւններ սկսելու պատրաստակամութեան մասին նախագահ Ալիեւը անցեալ շաբաթներուն Միւնիխի մէջ յայտարարած էր: