Միացեալ Նահանգներու Պետական Քարտուղար Էնթընի Պլինքընի Միջնորդութեամբ Միւնիխի Մէջ Հանդիպած Են Հայաստանի Ու Ատրպէյճանի Ղեկավարները:
Հայաստանն ու Ատրպէյճանը աւելի քան 30 տարի տեւող հակամարտութենէ յետոյ ամուր խաղաղութիւն ապահովելու պատմական հնարաւորութիւն ունին». այս մասին յայտնած է ԱՄՆ պետական քարտուղար Էնթընի Պլինքընը` Միւնիխի մէջ Հայաստանի եւ Ատրպէյճանի ղեկավարներուն հետ հանդիպման ժամանակ:
Հանդիպման մեկնարկին Էնթընի Պլինքընի բացման խօսքը հրապարակուած է ԱՄՆ Պետական Քարտուղարութեան կայքին մէջ:
«Կը փափաքիմ շնորհակալութիւն յայտնել նախագահ Ալիեւին եւ վարչապետ Փաշինեանին այստեղ ըլլալու համար: Մենք կը հաւատանք, որ Հայաստանն ու Ատրպէյճանը աւելի քան 30 տարի տեւող հակամարտութենէն յետոյ ամուր խաղաղութիւն ապահովելու իրապէս պատմական հնարաւորութիւն ունին: Կողմերը իրենք կեդրոնացած են խաղաղ գործընթացի վրայ երկկողմ երկխօսութեամբ, ինչպէս նաեւ ԵՄ-ի ու մեր հետ: ԱՄՆ պատրաստ է ընելու ամէն հնարաւորը այդ ջանքերուն աջակցելու համար` ըլլայ այդ ուղղակիօրէն մեր բարեկամներուն, թէ եռակողմ ձեւաչափով, ինչպիսին այս հանդիպումն է կամ միջազգային այլ գործընկերներու հետ: Բայց ես շատ շնորհակալ եմ թէ՛ նախագահին, թէ՛ վարչապետին ներկայութեան համար եւ կ’ակնկալեմ լաւ խօսակցութիւն», ըսած է Պլինքըն:
Հայաստանի կառավարութեան փոխանցմամբ` եռակողմ հանդիպման ընթացքին քննարկած են Հայաստանի եւ Ատրպէյճանի միջեւ խաղաղութեան պայմանագրի նախագիծի աշխատանքներուն ընթացքը:
Տարածաշրջանային ճանապարհային ենթակառուցուածքներու ապաշրջափակումն ու երկու երկիրներուն միջեւ սահմանազատման հարցերը եղած են օրակարգին վրայ: Անոնք քննարկուած են Փրակի մէջ ձեռք բերուած պայմանաւորուածութիւններու ծիրին մէջ:
Ըստ հայկական կողմին` վարչապետ Նիկոլ Փաշինեան վերահաստատած է Հայաստանի նպատակամղուածութիւնը` հասնելու այնպիսի պայմանագրի ստորագրման, որ իսկապէս կ’երաշխաւորէ տարածաշրջանին մէջ երկարաժամկէտ խաղաղութիւնն ու կայունութիւնը:
Փաշինեան ընդգծած է նաեւ Ատրպէյճանի` Լաչինի միջանցքը ապօրինի շրջափակելու եւ անոր հետեւանքով Արցախի մէջ ստեղծուած մարդասիրական, բնապահպանական եւ ուժանիւթային ճգնաժամի փաստը:
«Մենք կը հաւատանք,որ 30 տարուան հակամարտութենէն յետոյ Հայաստանն ու Ատրպէյճանը ունին հնարաւորութիւն խաղաղութիւն ապահովելու», նշած է ԱՄՆ պետական քարտուղար Պլինքընը:
«Կողմերը կեդրոնացած են խաղաղութեան գործընթացին վրայ, այդ շարքին` ուղիղ երկխօսութեան միջոցով, ինչպէս նաեւ Եւրոմիութեան եւ մեր հետ: Միացեալ Նահանգները հաստատակամ է օժանդակելու այս ջանքերուն, թէ՛ մեր ընկերներուն, թէ՛ այսպիսի եռակողմի ձեւաչափերով, թէ՛ այլ միջազգային գործընկերներու հետ», նաեւ ըսած է պետական քարտուղարը:
