Արցախը կը շարունակէ մնալ լիակատար շրջափակման մէջ եւ մինչ այս պահը միայն Կարմիր Խաչի Միջազգային Կոմիտէն ու ռուս խաղաղապահ զօրակազմը ունին Արցախ ելք եւ մուտք իրականացնելու հնարաւորութիւն, իսկ համացանցին վրայ տարածուող որեւէ այլ տեղեկատուութիւն իրականութեան չի համապատասխաներ, կը յայտնէ Արցախի տեղեկատուական շտաբը:
«Շուրջ 40 օր է ատրպէյճանական կողմի ապակառուցողական վարքի պատճառով փակ է Արցախը Հայաստանին կապող միակ ճանապարհը: Տեղեկացնում ենք, որ շրջափակման ընթացքում Արցախ չի մատակարարուել հազարաւոր թոներով կենսական նշանակութեան ապրանքներ, իսկ Կարմիր Խաչի Միջազգային Կոմիտէի եւ ռուս խաղաղապահ զօրակազմի կողմից Արցախ մատակարարուած ապրանքները չնչին մաս են կազմում:
Այս ընթացքում Արցախի Հանրապետութեան տարբեր գերատեսչութիւններ Հայաստանի ու Սփիւռքի մեր հայրենակիցներից, տարբեր հասարակական կազմակերպութիւններից ու կառոյցներից բազմաթիւ հեռախօսազանգեր են ստանում` Արցախին մարդասիրական օգնութիւն ուղարկելու ցանկութեամբ, սակայն տեղեկացնում ենք, որ Արցախը շարունակում է մնալ լիակատար շրջափակման մէջ եւ մինչ այս պահը միայն Կարմիր Խաչի Միջազգային Կոմիտէն ու ռուս խաղաղապահ զօրակազմն ունեն Արցախ ելք եւ մուտք իրականացնելու հնարաւորութիւն, իսկ համացանցում տարածուող որեւէ այլ տեղեկատուութիւն իրականութեանը չի համապատասխանում:
Տեղեկացնում ենք նաեւ, որ Արցախի պետական գերատեսչութիւնների հետ չհամաձայնեցուած ցանկացած դրամահաւաք առնուազն խնդրայարոյց է, իսկ ճանապարհի արգելափակման հետեւանքով ՀՀ-ում գտնուող Արցախի քաղաքացիների խնդիրներով զբաղւում է ՀՀ կառավարութեան կողմից ստեղծուած աշխատանքային խումբը` Արցախի պատկան գերատեսչութիւնների հետ փոխգործակցութեամբ», նշուած է յայտարարութեան մէջ:
