ՀՀ Պաշտպանութեան Նախարարութեան «N» զօրամասի ճարտարապետական-սակրաւորային վաշտի կացարանին մէջ Յունուար 19-ին բռնկած հրդեհի հետեւանքով զոհուած է 15 զինուոր, 3 զինուորի վիճակը կը գնահատուի ծանր:
Յունուար 19-ին` ժամը 01:30-ի սահմաններուն, հրդեհ բռնկած է Գեղարքունիքի մարզի Ազատ գիւղի տարածքին մէջ տեղակայուած ՀՀ Պաշտպանութեան Նախարարութեան «N» զօրամասի ճարտարապետական-սակրաւորային վաշտի կացարանին մէջ:
Կառավարութեան նիստին ժամանակ վարչապետ Նիկոլ Փաշինեան որոշ մանրամասնութիւններ ներկայացուցած է 15 զինուորի մահուան պատճառ դարձած հրդեհի դէպքէն: Վարչապետը նախ նշած է, որ 2022 թուականի Դեկտեմբեր 21-ին Զինուած Ուժերու Գլխաւոր Շտաբի պետը ստորագրած է կարգադրութիւն հետեւեալ վերնագրով` «Զինուած ուժերու զօրամասերուն մէջ տեղի ունեցած հրդեհներու եւ անոնց կանխարգիլման մասին», որուն մէջ յստակ հրահանգաւորած է, թէ ինչ պէտք է ընել հակահրդեհային կանոնները պահպանելու համար:
«7-րդ կէտում նշւում է` խստիւ արգելել վառարանների շահագործման համար որպէս կպչան պենզին, նեֆրազ եւ այլ տեսակի դիւրավառ հեղուկների օգտագործումը, դրանք պահպանել այլ հեղուկներից առանձին: Սա զինուորական բարձրաստիճան պաշտօնեայի տուած հրամանն է, եւ այս հրամանի պարզ պահպանումը թոյլ կը տար չունենալ այս դէպքը», ընդգծեց Փաշինեան` յաւելելով, որ վառարանը վառելու համար յատուկ այրիչներ բաժանուած են, որպէսզի լրացուցիչ միջոցներու կարիք չըլլայ:
Վարչապետը յայտնեց, որ նախնական տուեալներով` զօրամասի ճարտարապետական-սակրաւորային վաշտի կացարանին մէջ փորձ կատարուած է պենզինը օգտագործել վառարանը վառելու համար:
Պաշտպանութեան նախարար Սուրէն Պապիկեան իր հերթին զեկուցեց, որ վարչապետի յանձնարարականին մասով ինչ աշխատանքներ իրականացուած են:
«Զբաղեցրած պաշտօններից ազատուել են 2-րդ բանակային զօրամասի շտաբի պետը, թիկունքի պետը, զօրամասի հրամանատարի տեղակալը մարտական հերթապահութեան գծով, «N» զօրամասի շտաբի պետ, հրամանատարի տեղակալ թիկունքի գծով, «N» զօրամասի ճարտարապետական ծառայութեան պետ, «N» զօրամասի ճարտարապետական-սակրաւորային վաշտի հրամանատար եւ զինուած ուժերի թիկունքի վարչութեան, հրդեհային անվտանգութեան ծառայութեան պետը», ըսաւ Պապիկեան:
Պաշտպանութեան նախարարին խօսքով` անոնց զբաղեցուցած պաշտօնները ինչ-որ կերպ կ’առնչուին դէպքին:
«Հետագայում քրէաիրաւական գնահատական պէտք է տրուի, ուստի նրանց հետագայ պաշտօնավարումը նպատակայարմար չէ», եզրափակեց Պապիկեան:
