Մոսկուան կը պնդէ, որ շարք մը սկզբունքային հարցերու մէջ Երեւանը հակասական դիրքորոշումներ կը յայտնէ: «Մենք մէկ հարցի կամ մանրմասնութեան շուրջ չէ, որ կը տեսնենք հակասութիւններ. այդպիսի թեմաները քանի մը հատ են, եւ անոնք լուրջ թեմաներ են», յայտնած է Ռուսիոյ Արտաքին Գործերու Նախարարութեան պաշտօնական ներկայացուցիչ Մարիա Զախարովան:
«Մենք գնահատականներու միջեւ տարբերութիւն կը տեսնենք հարցերուն մէջ, որոնք լրջագոյն նշանակութիւն ունին ոչ միայն Հայաստանի, այլեւ տարածաշրջանի անվտանգութեան համար», յաւելած է ան:
«Ես ասել եմ, որ պատրաստ ենք Ռուսաստանի առաջարկած բանաձեւի հիման վրայ ստորագրել փաստաթուղթ, եւ այսօր էլ վերահաստատում եմ դա», երկու օր առաջ լրագրողներու հետ հանդիպման նշած էր Նիկոլ Փաշինեանը:
Մոսկուայէն արձագանգած են նաեւ Փաշինեանի այս յայտարարութեան, թէ պատրաստ է ընդունելու ղարաբաղեան խնդիրի կարգաւորման ռուսական տարբերակը: «Պաշտօնական Երեւանի յայտարարութիւնները նոյն հարցին վերաբերեալ էապէս կը տարբերին»,- ըսած է Մարիա Զախարովան: – «Հայաստանի վարչապետը խօսած է ե՛ւ ռուսական առաջարկութիւններու հիման վրայ փաստաթուղթ ստորագրելու մտադրութեան, ե՛ւ միաժամանակ հակամարտութեան ինչ-որ «համապարփակ լուծման» նախընտրելիութեան մը մասին, որ կ՛առաջադրէ Արեւմուտքը: Մենք 24-ժամեայ շփման մէջ ենք կողմերուն հետ, եւ կը փորձենք հայկական կողմէ, լիազօրութիւններով օժտուած համապատասխան անձերէ յստակացնել, թէ որ տեսակէտը կը պաշտպանեն: Հարցերը սկզբունքային են, հետեւաբար դիրքորոշումները եւս պէտք է յստակ ձեւակերպուին: Հնարաւոր է` որոշ շեղումներով, հնարաւոր է` որոշ վերապահումներով, բայց գնահատականը պէտք է ձեւակերպուի առանց անոր սկզբունքային հիմքերու փոփոխութեան»:
Զախարովան յիշեցուցած է նաեւ, որ Երեւանը չեղարկեց Մոսկուայի մէջ Հայաստանի ու Ատրպէյճանի արտաքին գործերու նախարարներուն հանդիպումը, ինչ որ Մոսկուայի առաջարկն էր: Ըստ անոր, այդ հանդիպման տապալման պատճառով չեն քննարկուած հրատապ հարցեր, այդ շարքին Լաչինի միջանցքին մէջ ստեղծուած իրավիճակը:
«Եթէ հայ գործընկերները իսկապէս շահագրգռուած են նշուած խնդիրները լուծելու բարձր մակարդակով, եռակողմ պայմանաւորուածութիւններու համալիր իրականացման հունով, ապա անհրաժեշտ է շարունակել համատեղ աշխատանքը», – ըսած է Զախարովան` ընդգծելով, որ այստեղ կարեւոր է համատեղ բառը: – «Մեր դիրքորոշումը հիմնուած է ոչ թէ փոփուլիզմի, այլ յստակ քայլերու վրայ, որոնք թէ’ միջազգային հիմքեր ունին, թէ’ մեր կողմէ առանձնացուած միջոցներ, եւ որ շատ կարեւոր է` մասնակից բոլոր կողմերուն համաձայնութիւնը: Եթէ կան համաձայնութիւններ, պէտք է անոնց հետեւիլ, կամ հրապարակաւ ազնիւ ըսել, որ դիրքորոշումները փոխուած են»:
Ան կոչ ըրած է Փաշինեանին հայ ժողովուրդին ազնուօրէն պատմելու իր պայմանաւորուածութիւներուն մասին: