Արցախի Հանրապետութեան նախագահ Արայիկ Յարութիւնեան յայտարարութեամբ հանդէս եկած է` անդրադառնալով վերջին օրերու ստեղծուած վիճակին: Յայտարարութիւնը տեղադրուած է նախագահի ֆէյսպուքեան էջով:
«Յարգելի՛ հայրենակիցներ,
Արդէն չորրորդ օրն է` Ատրպէյճանը «յուզական» եւ ուշադրութեան գրաւման համար հետաքրքրական` բնապահպանական կեղծ թեմաներով համեմուած օրակարգով շրջափակման մէջ է պահում Արցախի 120.000 բնակչութեանը` այդ կերպ արցախահայութեանը կանգնեցնելով մարդասիրական աղէտի առջեւ: Բայց ինչպէս տեսնում ենք, արցախցին ծնկի չի եկել եւ արժանապատուօրէն յաղթահարում է 21-րդ դարին անհամատեղելի ու քաղաքակիրթ մարդու համար գրեթէ աներեւակայելի մերօրեայ գործընթացներն ու դրանցից ծնուող դժուարութիւնները, տառապանքները, մարդասիրական հետեւանքները:
Այս կապակցութեամբ Արցախի Հանրապետութեան ժողովրդի անունից յայտարարում եմ`
Արցախի ժողովուրդը տարածաշրջանում խաղաղութեան, կայունութեան, ժողովուրդների բարիդրացիական յարաբերութիւնների կողմնակիցն ու ջատագովն է.
Արցախի ժողովուրդը բաց է որեւէ հարցի, խնդրի քննարկման, ազատ երկխօսութեան համար, տրամադրուած է կառուցելու եւ ակնկալում է փոխադարձ իրաւունքների յարգանքի հիման վրայ ձեւաւորուած կառուցողական յարաբերութիւններ.
Մենք անընդունելի ենք համարում պարտադրանքի, հարկադրանքի, ուժի ցուցադրման ու կիրառման սպառնալիքի գործադրումը եւ կոչ ենք անում վերջնականապէս հրաժարուել արցախեան ազատագրական պայքարի մեկնարկի պատճառ դարձած եւ Ատրպէյճանի պետական քաղաքականութեան անբաժանելի մաս հանդիսացող` Արցախը հայաթափելու գաղափարից: Միայն այդ դէպքում է խաղաղութեան հասնելու կամքը լինելու գնահատելի, իսկ խաղաղութիւնը` անկեղծ, իրական ու շօշափելի.
Արցախի ժողովուրդն ընդունել է իր իրաւունքների դէմ ուղղուած ոտնձգութեանը դիմակայելու եւ մեզ հասցուած ֆիզիքական զրկանքները արժանապատուօրէն կրելու որոշում` այդ կերպ չէզոքացնելով Մայր Հայաստանին զիջումներ պարտադրելու բոլոր հնարաւոր փորձերը, որոշման կայացումը կաշկանդող պայմանները.
Մեր երախտագիտութիւնն ենք յայտնում Հայաստանի Հանրապետութեանը եւ սփիւռքի մեր այն հայրենակիցներին, ովքեր Արցախի Հանրապետութեան քաղաքացիների նկատմամբ այս օրերին կատարուող ոճրագործութեան մասին բարձրաձայնում եւ իրազեկում են միջազգային հանրութեանը, նախաձեռնում իրաւական գործընթացներ, պարզապէս քաջալերում եւ գօտեպնդում են արցախցուն.
Մեր երախտագիտութիւնն ենք յայտնում ռուս խաղաղապահներին` իրենց առաքելութեանը հաւատարիմ մնալու համար: Օրեր շարունակ խաղաղապահները, առանց տեղացող սադրանքներին, ցուցադրական վիրաւորանքներին ու արհամարհական վերաբերմունքին տուրք տալու հաստատակամ ու անսասան կեցուածքով կանգնած են Արցախի ժողովրդի կողքին:
Մենք բարձր ենք գնահատում խաղաղապահների գիտակցուած քայլերը` ուղղուած մեր ժողովրդի հումանիտար խնդիրները մեղմելուն, շարունակելու ենք մեր պայքարը եւ երբեք չենք լինելու Ռուսաստանի Դաշնութեան վրայ ճնշում գործադրելու կամ նրա հեղինակութեանը վնաս հասցնելու գործիք, քանզի վստահ ենք, որ Ռուսաստանի Դաշնութիւնում առկայ է խնդիրները դիւանագիտօրէն եւ երկխօսութեան ճանապարհով հանգուցալուծելու անբեկանելի կամք», կը նշուի յայտարարութեան մէջ:
