Հայաստան կը վերականգնէ խզուած դիւանագիտական յարաբերութիւնները Հունգարիոյ հետ, կը յայտնէ Արտաքին Գործերու Նախարարութիւնը` մանրամասնելով, որ այս պայմանաւորուածութիւնը ձեռք բերուած է երկու երկիրներու արտաքին գործերու նախարարներուն միջեւ` Լեհաստանի մէջ ԵԱՀԿ Նախարարական Համաժողովի ծիրին մէջ ունեցած հանդիպման ընթացքին:
«Արարատ Միրզոյեանը եւ Փիթըր Սիյարթօն մտադրութիւն են յայտնել նոր էջ բացել հայ-հունգարական յարաբերութիւններում` հիմնուած փոխադարձ վստահութեան եւ միջազգային իրաւունքի նկատմամբ յարգանքի վրայ», կը յայտնէ Արտաքին Գործերու Նախարարութիւնը:
Յարաբերութիւնները վերականգնելու պայմանաւորուածութենէն բացի Երեւանն ու Պուտափեշթը արդէն յաջորդ քայլին դիմած են, որոշած են նշանակել ոչ-բնակիչ դեսպաններ` ուսումնասիրելու յարաբերութիւններու զարգացման հնարաւորութիւնները առեւտուրի, մշակոյթի, կրթութեան եւ զբօսաշրջութեան ոլորտներուն մէջ, շուտով պիտի մեկնարկեն դիւանագիտական եւ վարչական ընթացակարգերը:
Հայաստանը Հունգարիոյ հետ դիւանագիտական յարաբերութիւնները խզած էր 2012 թուականին, երբ այդ երկիրը Ատրպէյճանին արտայանձնեց 2004-ին Հունգարիոյ մէջ հայ լեյթենանթ Գուրգէն Մարգարեանի սպանութեան համար դատապարտուած Ռամիլ Սաֆարովը, որ հայրենիք վերադառնալէ յետոյ յայտնուեցաւ ազատութեան մէջ: Հայաստանի այն ժամանակուայ նախագահ Սերժ Սարգսեանը սա անուանած էր աններելի: