Վարչապետ Նիկոլ Փաշինեանի գլխաւորութեամբ Բարձր Արհեստագիտական Արդիւնաբերութեան Նախարարութեան մէջ տեղի ունեցած է գերատեսչութեան 2022 թուականի գործունէութեան հաշուետուութեան քննարկում:
Քննարկման սկիզբը Նիկոլ Փաշինեանը նշած է. «Նախարարութիւնների եւ գերատեսչութիւնների 2022 թուականի գործունէութեան արդիւնքներն ամփոփելու շրջանակում այսօր մենք Բարձր Արհեստագիտական Արդիւնաբերութեան Նախարարութիւնում ենք: Ճիշդ է, օրացուցային տարին դեռ չի աւարտուել, բայց, ըստ էութեան, մենք այսօր կարող ենք ամփոփել արդիւնքները, որովհետեւ այն, ինչը պէտք է յառաջիկայ ամսուայ ընթացքում տեղի ունենայ, արդէն պէտք է ծրագրաւորուած եւ ընթացքի մէջ լինի»:
Բարձր Արհեստագիտական Արդիւնաբերութեան Նախարարութեան նախարար Ռոպերթ Խաչատրեանը նախ ամփոփ ներկայացուցած է նախարարութեան ընթացիկ ու յառաջիկայ ծրագիրները, ապա խօսքը փոխանցած է տարբեր ոլորտները համակարգող փոխնախարարներուն:
Այնուհետեւ անդրադարձ կատարուած է Համաշխարհային նորարարական ցուցիչով Հայաստանի վարկանիշին, արձանագրուած դրական եւ բացասական ցուցանիշներուն: Յաջորդիւ ներկայացուած է սթարթափներու զարգացման ուղղութեամբ իրականացուող քայլերուն, մասնաւորապէս` «Գաղափարէն մինչեւ առեւտուր» ծրագրին, որուն շրջանակին մէջ լաւագոյն նախագիծեր ներկայացրած նորաստեղծ ընկերութիւններուն պետութեան կողմէ կը տրամադրուին դրամաշնորհներ, օժանդակութիւն կը ցուցաբերուի վերջիններուս հետագայ գործունէութեան ու շուկայ մուտք գործելուն: Վարչապետը կարեւորած է ծրագրի իրականացումը եւ պատասխանատուներուն յանձնարարած է վերջինիս արդիւնաւէտութեան բարձրացման նպատակով ձեռնարկել հետեւողական քայլեր` ընդգծելով պիւտճէի կատարողականի բարձր մակարդակի ապահովման, հանրութեան շրջանին մէջ ծրագրին վերաբերեալ աւելի լայն իրազեկում իրականացնելու եւ շահառուներու ցանկը ընդլայնելու անհրաժեշտութիւնը:
Նշուած է, որ յաջողութեամբ ընթացքի մէջ է աշխատաշուկայէն նոր աշխատակիցներ ներգրաւող ընկերութիւններուն աշխատավարձերու եկամտահարկի 50 տոկոսի վերադարձի ծրագիրը, որուն շրջանակին մէջ պետութեան կողմէ արդէն իսկ տրամադրուած է 2,8 միլիառ դրամ: Զեկուցուած է, որ տեղեկատուական արհեստագիտութեան շարք մը ընկերութիւններ բարձրագոյն ուսումնական հաստատութիւն-մասնաւոր հատուած ծրագրի միջոցով ընթացիկ տարուան մէջ ներգրաւուած են միջին եւ բարձր որակաւորում ունեցող աւելի քան 700 աշխատակիցներ: Ծրագրի պիւտճէն այս տարի կազմած է 231 միլիոն դրամ, իսկ 2023-ին այն պիտի հասնի 311 միլիոն դրամի:
Օժանդակութիւն ցուցաբերուած է հայկական ընկերութիւններու` միջազգային համագումարներու մասնակցութեան: Որպէս հետեւանք, ընթացիկ տարուան ընթացքին հայկական տարբեր ընկերութիւններ միջազգային գործընկերներու հետ ստորագրած են 320 միլիոն դրամի պայմանագրեր:
Վարչապետին զեկուցուած են տիեզերական ոլորտի զարգացման ուղղուած քայլերը: Ընդգծելով այս տարուան ընթացքին հայկական ռազմավարական առաջին արբանեակի տիեզերք արձակման փաստը` պատասխանատուները նշած են, որ մինչեւ 2028 թուականը Հայաստան կը նախատեսէ տիեզերք արձակել հայկական եւս երկու արբանեակ: Կը նախատեսուի 2023 թուականին Հայաստանի մէջ ստեղծել արբանեակի կառավարման կեդրոն եւ ընդունիչ կայան, որուն գլխաւոր գործառոյթներէն են արբանեակի կառավարումը, տիեզերալուսանկարներու ստացումը: Այդ նպատակով ընթացքի մէջ է մասնագէտների վերապատրաստման գործընթացը:
Նիկոլ Փաշինեան կարեւորած է այս ուղղութեամբ հետեւողական քայլերու իրականացումը եւ շեշտած է, որ ոլորտի զարգացումը պիտի շարունակէ ըլլալ կառավարութեան ուշադրութեան կեդրոնին:
Ամփոփելով` վարչապետն ընդգծած է Հայաստանի մէջ բարձր արհեստագիտական ոլորտի, կապի, հեռահաղորդակցութեան ենթակառուցուածքներու հետեւողական ու շարունակական զարգացման ուղղութեամբ կառավարութեան նպատակադրումը եւ նշած է ծրագիրներու արդիւնաւէտ իրականացման անհրաժեշտութիւնը: Նիկոլ Փաշինեան յանձնարարած է պատասխանատուներուն` յառաջիկային ներկայացնել այս խորհրդակցութեան ընթացքին բարձրացուած խնդիրներու եւ հարցերու լուծման «ճանապարհային քարտէզ»` վերը նշուած ուղղութիւններով յառաջ շարժելու եւ զարգացում ապահովելու նպատակով:
