Հայաստանի մէջ Հնդկաստանի նախկին դեսպան Ռինա Փանտէյ անդրադարձած է շրջանառուող լուրերուն, որ Հայաստանը Հնդկաստանէն զէնք եւ զինամթերք գնած է: Անդրադառնալով Հայաստանին զէնքի վաճառքի վերաբերեալ մամուլին մէջ տեղ գտած լուրերուն վերաբերեալ հարցին, Փանտէյ պատասխանեց.
«Բոլոր երկիրները պաշտպանական համաձայնագրեր ունեն: Եւ շատ լաւ է, որ մէկն ունինք այստեղ (Հայաստանի մէջ-Խմբ.): Եւ մենք կրնանք համագործակցիլ համատեղ (զէնքի-Խմբ.) արտադրութեան շուրջ նոյնպէս: Պաշտպանութեան ոլորտին մէջ դուք որոշակի փորձ ունիք, մենք եւս որոշակի ունինք, այսպիսով` մենք կրնանք կիսուիլ այդ փորձառութեամբ», ըսաւ Փանտէյ:
Ռազմական համագործակցութեան վերաբերեալ հարցին ի պատասխան` Հայաստանի մէջ Հնդկաստանի նախկին դեսպանը նշեց, որ լաւ պիտի ըլլայ նաեւ, որ հայ եւ հնդիկ զինուորականները համատեղ վարժանքներ անցընեն:
