Արցախը առանձին միաւոր է, որ պէտք է մասնակցի իր ապագային վերաբերեալ որոշումներու կայացման, RTVI հեռուստաալիքին տուած հարցազրոյցին մէջ յայտարարած է Արցախի պետական նախարար Ռուբէն Վարդանեանը:
«Երկրորդն անվտանգութիւնն է: Պէտք է ամէն ինչ անենք, որ Արցախի հայութեան կեանքին վտանգ չսպառնայ: Անվտանգութիւնը պէտք է ապահովեն ինչպէս իրենք` Արցախի բնակիչները, այնպէս էլ մեր միջազգային գործընկերները` նկատի ունեմ ե՛ւ խաղաղապահներին, ե՛ւ ամբողջ միջազգային հանրութիւնը: Որովհետեւ գործ ունենք նաեւ մարդասիրական աղէտի հետ, այլ ոչ միայն ռազմական: Եւ երրորդը, ի հարկէ, Արցախի ընկերա-տնտեսական ու մշակութային զարգացումն է», ընդգծած է Վարդանեան:
Ռուբէն Վարդանեանը նշած է, որ դեռ 2018 թուականին, Հայաստանի ապագայ վարչապետ Նիկոլ Փաշինեանի հետ առաջին հանդիպման ժամանակ անոր ըսած է, որ իրեն յուզող միակ թեման, որուն համար պատրաստ է փոխելու իր կենսակերպը, Արցախն է:
«Ես երբեք չեմ միջամտել նախորդ նախագահների քաղաքական գործունէութեանը, հիմա եւս չեմ պատրաստւում միջամտել, բայց Արցախն ինձ համար կարմիր գիծ է… Ես մշտապէս շատ հետեւողականօրէն ասել եւ հրապարակային յայտարարել եմ, որ Արցախն ինձ համար կարմիր գիծ է, եւ այս տեսանկիւնից ես անթոյլատրելի եմ համարում, որ հայկական էլիտան պարզապէս հետեւի, թէ ինչ է տեղի ունենում Արցախում եւ ոչինչ չանի: … Որոշումը, որ պէտք է ինչ-որ բան անել, կայացուեց շատ տարբեր մարդկանց հետ քննարկումների արդիւնքում: Որոշակի փուլում մենք հասկացանք, որ ժամանակն է որոշում կայացնելու․ կամ դու` որպէս մարդ, ով պատրաստ է պատասխանատուութիւն կրել ոչ միայն իր, իր ընտանիքի, այլ նաեւ իր ազգի համար, ընդունում ես դա եւ գնում այդ քայլին, կամ ոչ», ընդգծած է պետական նախարարը:
Պատասխանելով ռազմական գործողութիւններու դադրեցման մասին հարցին` Ռուբէն Վարդանեան ըսած է, որ պէտք է գիտակցիլ, որ այս 30 տարուան ընթացքին տարբեր փուլեր եղած են. «Այս իմաստով, եթէ մենք ողջ ընթացքում շարունակում ենք ռազմական հռետորաբանութիւնը, դա փակուղի է, քանի որ պարբերաբար այս կամ այն երկրում ի յայտ են գալու դրական կամ բացասական հանգամանքներ… Եթէ Ատրպէյճանը նաւթ չունենար, եթէ Թուրքիան չորոշեր պատերազմում ներգրաւուել այն ծաւալով, որով ներգրաւուած էր, եւ բազմաթիւ այլ հանգամանքներ… Հիմա մի իրավիճակ է, վաղը ստեղծուելու է մէկ այլ իրավիճակ, եւ այդպէս մենք անվերջ պատերազմելու ենք: Մենք պէտք է մտածենք այն մասին, որ այսպէս չի կարող անվերջ շարունակուել: Կարծում եմ` նաեւ ատրպէյճանցի մայրերը չեն ուզում, որ նորից պատերազմ լինի, ու իրենց որդիները զոհուեն»:
Անդրադառնալով Թուրքիոյ դերին` Ռուբէն Վարդանեան նշած է, որ Թուրքիան միջնորդ չէ, այն հակամարտութեան կողմ է, դաշնակից ու այդ չի թաքցներ. «Բայց կարծում եմ, որ Թուրքիայի դիրքորոշումն առ այն, որ «ես գործուն մասնակից եմ», ոչ միայն Հայաստանին դուր չի գալիս, այլ նաեւ Ատրպէյճանին: Ես կարծում եմ, որ Ատրպէյճանում ոչ բոլորին է դուր գալիս, որ Թուրքիան այսքան գործուն եւ յարձակողական միջամտում է Ատրպէյճանի ղեկավարութեան գործունէութեանը»:
