Ատրպէյճանի հետ յարաբերութիւններուն մէջ շարունակուող լարուածութեան ծիրին մէջ Հայաստանը կը դիտարկէ Հնդկաստանի հետ պաշտպանական նոր գործարքներ կնքելու հնարաւորութիւնը․ զենիթահրթիռային համալիրներէն զատ, ինչպիսին է «Աքաշ»-ը («Akash»), Հայաստանը կը դիտարկէ անօդաչու թռչող սարքերու եւ այլ զինամթերքի հնարաւոր գնումը: Այս մասին կը նշէ հնդկական «ThePrint» առցանց թերթը:
«Հայաստանի պաշտպանութեան նախարար Սուրէն Պապիկեանի եւ անոր գործընկեր` Հնդկաստանի պաշտպանութեան նախարար Շրի Ռաջճնաթ Սինկհի երկկողմ հանդիպման ժամանակ ուշադրութեան կեդրոնին եղած է պաշտպանութեան ոլորտին մէջ համագործակցութեան խորացումը, որ տեղի ունեցած է Հոկտեմբեր 18-ին Կանտինակար քաղաքին մէջ «DEFEXPO» 2022-ի շրջանակներուն մէջ: Հանդիպումը տեղի ունեցած է ընդամէնը քանի մը շաբաթ անց այն բանէն, երբ երկու երկիրները հնդկական «Փինաքա» համազարկային կրակի համակարգերու, «Քոնքուրս» հակահրասայլային հրթիռային համակարգերու, ինչպէս նաեւ զինամթերքի լայն տեսականիի, այդ շարքին` 80 մմ ականանետի վաճառքի միջկառավարական պայմանագիր կնքած են», կը նշէ «ThePrint»-ը:
Ըստ թերթին` Հնդկաստանի կառավարութեան աղբիւրները կը շարունակեն լռել այն մասին, թէ ինչ տեղի ունեցած է հայ նախարարին հետ երկկողմ հանդիպման ժամանակ, սակայն կը պնդեն, որ «ուշադրութեան կեդրոնին եղած է համագործակցութիւնը պաշտպանութեան ոլորտին մէջ»:
«ThePrint»-ի աղբիւրներուն համաձայն` Հնդկաստանի կառավարութիւնը հանդէս եկած է Հայաստանի հետ պաշտպանութեան ոլորտին մէջ համագործակցութեան օգտին` Ատրպէյճանի հետ յարաբերութիւններուն մէջ առկայ լարուածութեան պատճառով, երկրի մը, որուն կ’աջակցին Թուրքիան եւ Փաքիստանը:
«ThePrint»-ի աղբիւրները յայտնած են, որ Հայաստանը կը դիտարկէ տեղական «Աքաշ» զենիթահրթիռային համակարգերու գնման հնարաւորութիւնը:
«Հայաստանը նաեւ կը դիտարկէ Հնդկաստանի մէջ մասնաւոր ընկերութիւններու` Tata Advanced Systems Limited-ի (TASL) եւ Solar Industries-ի կողմէ մշակուած «քամիքազ» անօդաչու թռչող սարքեր (loitering munition) գնելու հնարաւորութիւնը» յայտնած է «ThePrint»-ը:
Ինչպէս աւելի վաղ յայտնած էր «The Print»-ը, շատերը Ատրպէյճանը կը դիտարկեն որպէս Թուրքիոյ եւ Փաքիստանի հետ ձեւաւորուող առանցքի մաս: Ատրպէյճանը օգտագործած է թրքական անօդաչուները Հայաստանի դէմ պատերազմ վարելու համար, ինչպէս նաեւ «JF-17» կործանիչներ գնելու համար բանակցութիւններ կը վարէ Փաքիստանի հետ:
