Ֆրանսայի Ծերակոյտին մէջ կ’առաջարկուի ընդունիլ վերջին յարձակումներու առնչութեամբ Ատրպէյճանի դէմ պատժամիջոցներ եւ Հայաստանի տարածքէն ատրպէյճանական զօրքերու դուրսբերում, հայ ռազմագերիներու անյապաղ ու առանց նախապայմաններու հայրենադարձում պահանջող բանաձեւ:
Բանաձեւի նախագիծին մէջ, որ հրապարակուած է ֆրանսական խորհրդարանի Վերին Պալատի պաշտօնական կայքէջին մէջ, վճռականօրէն կը դատապարտուի ատրպէյճանական յարձակումը այս տարուան Օգոստոսի սկիզբը Հայաստանը եւ Լեռնային Ղարաբաղը կապող Լաչինի միջանցքին մէջ ու Սեպտեմբեր 13-14-ին Հայաստանի ինքնիշխան տարածքի հարաւային եւ հարաւարեւելեան շրջաններուն մէջ:
Ծերակոյտը նախագիծը ընդունուելու պարագային ֆրանսական կառավարութենէն պիտի պահանջէ հետամուտ ըլլալ, որպէսզի ՄԱԿ-ի Անվտանգութեան Խորհուրդը, ուր արտակարգ նիստի ժամանակ միջազգային հանրութիւնը դատապարտած է ատրպէյճանական յարձակումը, դիմիէ միջազգային Քրէական Դատարան «Հայաստանի Հանրապետութեան ինքնիշխան տարածքին մէջ Ատրպէյճանի յարձակման հարցով, այդ շարքին` հետաքննելու զանգուածային եւ պատերազմական յանցագործութիւնները»:
Նախագիծը կառավարութեան կոչ կ’ընէ եւրոպական գործընկերներուն հետ դիտարկել աւելի վճռական պատշաճ պատասխաններ ատրպէյճանական նոր յարձակումներուն, այդ շարքին` ատրպէյճանական ղեկավարներու գոյքի բռնագրաւում եւ նաւարգելում Ատրպէյճանէն կազի ու քարիւղի արտահանման վրայ:
Ծերակոյտի բանաձեւին նախագիծը ֆրանսական կառավարութեան կը յորդորէ «բոլոր միջոցներով ցոյց տալ Ֆրանսայի սատարումը Հայաստանին` դիտարկելով մասնաւորապէս Հայաստանի պաշտպանունակութեան ուժեղացումը», եւ «անմիջապէս ձեռնարկել բոլոր միջոցները` ապահովելու հայ եւ Հայաստանի բնակչութիւններու անվտանգութիւնը միջազգայնօրէն ճանչցուած սահմաններուն մէջ»:
Նախագիծով վերահաստատուած է նաեւ «Լեռնային Ղարաբաղի Հանրապետութեան ճանաչման անհրաժեշտութիւնը», որուն մասին ֆրանսական խորհրդարանի երկու պալատները բանաձեւեր ընդունած էին դեռ 2020 թուականի 44-օրեայ պատերազմին զինադադարի հաստատումէն շատ չանցած: