Արցախի իշխանութիւններուն մշտապէս փոխանցուած է բանակցային գործընթացի մանրամասնութիւնները: Այս մասին ըսաւ Ազգային Ժողովի նախագահ Ալէն Սիմոնեանը:
«Արցախի կարգավիճակից հետ կանգնելու կամ չկանգնելու խնդիր չի եղել եւ չի խոստացուել: Խօսքը մշտապէս եղել է իրաւունքների մասին: Իրաւունքները շատ տարբեր են, եւ որպէսզի տպաւորութիւն չլինի, որ այսպէս ասած «վատ» իշխանութիւնները դաւադիր ինչ-որ փաստաթղթեր են մշակում, մենք մշտապէս ամբողջ տեղեկութիւնը տուել ենք Արցախի կողմին եւ որոշումներ կայացնելիս Արցախի կարծիքը եղել է որոշիչ: Հիմա մենք մէկ քայլ առաջ ենք գնում այդ հարցում եւ փորձում ենք բանակցութիւնների սեղանին վերադարձել Արցախին, որպէսզի այլ հարց չլինի, պայմանական, Արցախից մի կարծիք հնչի, Ազգային ժողովից մէկ այլ կարծիք հնչի», ըսաւ Սիմոնեանը:
ԱԺ նախագահին խօսքով` Արցախի իշխանութիւնները մշտապէս ամէն ինչ իմացած են` ամէն ստորակէտը եւ ձեւակերպումը:
«Նրանց տեղեկացուել եւ նրանք համաձայնել են, որովհետեւ այլ տարբերակ իրականութեան մէջ չկայ եւ չէր կարող լինել: Ասեմ աւելին, որ յաճախ նաեւ Արցախի մեր գործընկերներն են զգուշացրել, որ մտավախութիւն ունեն նաեւ Հայաստանի անվտանգութեան վերաբերեալ, զգուշացրել են, տեղեկութեամբ փոխանակուել: Եկէք մէկընդմիշտ յստակացնենք` որեւիցէ քայլ չի արուել եւ չի արուելու առանց Արցախի որոշման», եզրափակեց Սիմոնեան:
«Մենք մշտապէս ասել ենք, որ Արցախը պէտք է վերադառնայ բանակցութեան եւ շատ ուրախ կը լինենք, որ կարողանանք գտնել այդ մեխանիզմը վերադարձնելու ճանապարհը: Ինչ վերաբերւում է Արցախը մենակ թողնելուն, որեւիցէ մէկը մեր քաղաքացիներին մենակ չի թողել եւ խօսակցութիւններից վեր կան գործողութիւններ: Այսինքն` այն գործողութիւնները, որոնք արւում են այսօրուայ իշխանութիւնների կողմից ապացոյցն են, որ մենք Արցախին մենակ չենք թողնելու», ընդգծեց Սիմոնեան:
Հարցին` եթէ Ատրպէյճանը հրաժարի Արցախի հետ բանակցելէ, այդ պարագային ի՞նչ պիտի ընէ Հայաստանը, Ալէն Սիմոնեան պատասխանեց, որ պիտի շարունակեն Արցախի ժողովուրդին իրաւունքները պաշտպանել եւ պահել, ինչպէս կատարուած է 30 տարի շարունակ:
