Ազգային Ժողովի նախագահ Ալէն Սիմոնեանը կը պնդէ, որ ինք տեղեակ չէ, որ Ռուսիան կը փափաքի Հայաստանը դարձնել Ռուսիա-Պելառուսիա միութենական պետութեան կամ նոյնինքն Դաշնութեան մաս:
«Նման որեւիցէ խօսակցութեան ես իմ ռուս գործընկերների հետ ականատես չեմ եղել, նման խօսակցութիւն չկայ, ու գիտէք ինչ, ինձ համար չի էլ կարող լինել` Հայաստանի անկախութիւնն ու Հայաստանի ինքնիշխանութիւնը քննարկման ենթակայ չեն: Բացառում եմ, որ նման բան լինի, ու ես չիմանամ», ըսաւ ան:
Տեղեկութիւնը, յղում ընելով հաւաստի աղբիւրին, հրապարակած է վարչապետ Նիկոլ Փաշինեանի ընտանիքին պատկանող «Հայկական ժամանակ»ը:
Ընդ որում, պարբերականը արդէն երկրորդ օրն է` «հաւաստի աղբիւր» ստորագրութեամբ անանուն հրապարակումներ կ’ընէ բանակցային գործընթացին առնչուող մանրամասնութիւններու վերաբերեալ: Երէկ ալ պնդած էր, որ կը հրապարակէ Ատրպէյճանի 5 հիմնական պահանջները Հայաստանէն` Լեռնային Ղարաբաղի պաշտպանութեան բանակի լուծարում, Լեռնային Ղարաբաղի ճանաչում Ատրպէյճանի կազմին մէջ` առանց որեւէ` զերօ կարգավիճակով, միջանցք Հայաստանի տարածքով, եւ որ սահմանագծումը իրականացուի 1919-1920-ական թուականներու քարտէզներով, ինչպէս նաեւ անհետ կորսուած ատրպէյճանցիներու ճակատագրի պարզաբանում, ըստ հրապարակման` հնարաւոր է հետագային Հայաստանը պատերազմական յանցագործութիւններու մէջ մեղադրելու միտումով:
Ատրպէյճանի հետ համապարփակ խաղաղութեան հասնելու համար, ըստ վարչապետի ընտանիքին պատկանող պարբերականի հրապարակման, կա՛մ պէտք է բաւարարել այդ պահանջները, կա՛մ գտնել փոխզիջում, կա՛մ ալ Ատրպէյճանին ստիպել-համոզել հրաժարիլ այդ պահանջներէն:
Նիկոլ Փաշինեանի խմբակից Ալէն Սիմոնեանը կը յայտնէ, որ «Հայկական Ժամանակ»ի անանուն յօդուածագիրը հաւաստի աղբիւր չի համարեր: Բայց չի բացայայտեր ալ, որ Հայաստանի կարմիր գիծերը որոնք են Ատրպէյճանի հետ խաղաղութեան պայմանագրի շուրջ բանակցութիւններուն մէջ:
