Կիրակի երեկոյեան կայացած են Հայաստանի եւ Ատրպէյճանի արտաքին գործերու նախարարներուն բանակցութիւնները:
Նախօրէին Հայաստանի վարչապետը Հանրային հեռուստաընկերութեան տուած հարցազրոյցին ընթացքին ըսած էր, թէ Հայաստանի եւ Ատրպէյճանի արտաքին գործերու նախարարները պաշտօնապէս պիտի սկսին խաղաղութեան պայմանագրի բնագրի քննարկումները: Հանդիպումը, ըստ էութեան, առաջին նման քննարկումն էր:
Հանդիպումէն յետոյ Հայաստանի արտաքին քաղաքական գերատեսչութիւնը յայտարարեց, որ Միրզոյեան վերահաստատած է հայկական կողմին դիրքորոշումը` Հայաստանի Հանրապետութեան ինքնիշխան տարածքէն ատրպէյճանական զօրքերու դուրսբերման եւ բոլոր հայ ռազմագերիներու անյապաղ ազատ արձակման վերաբերեալ: Կարեւորուած է սահմանային իրավիճակի վերահսկման միջազգային մեխանիզմներու ներդրումը:
Ըստ Հայաստանի Արտաքին Գործերու Նախարարութեան` Միրզոյեան ընդգծած է, որ Ատրպէյճանի Զինուած Ուժերու իրականացուցած պատերազմական յանցագործութիւնները յստակ գնահատականի պէտք է արժանանան միջազգային ատեաններու կողմէ, իսկ յանցագործները` պատասխանատուութեան ենթարկուին:
Կողմերը միտքեր փոխանակած են Հայաստանի եւ Ատրպէյճանի միջեւ խաղաղութեան պայմանագրին, Լեռնային Ղարաբաղի հայութեան իրաւունքներու եւ անվտանգութեան երաշխիքներու ապահովման վերաբերեալ, այդ շարքին` Ստեփանակերտի եւ Պաքուի միջեւ քննարկումներու մեխանիզմու ստեղծման միջոցով: Ինչպէս Հայաստանի արտաքին քաղաքական գերատեսչութիւնը ընդգծել, որ դրական գնահատուած է երկուստեք ըմբռնումը, որ տարածաշրջանային ճանապարհային ուղիները պիտի ապաշրջափակուին երկիրներու ինքնիշխանութեան եւ իրաւազօրութեան ներքոյ:
Հանդիպումէն յետոյ Ատրպէյճանի Արտաքին Գործերու Նախարարութիւնն ալ յայտնեց, որ ատրպէյճանական կողմը առաջարկած է Հայաստանի հետ սահմանի սահմանազատման երկկողմ յանձնաժողովի յաջորդ նիստը տեղափոխել եւ աւելի շուտ կայացնել` Նոյեմբերի փոխարէն Հոկտեմբերին:
«Հաշուի առնելով չսահմանազատուած սահմանի լարուածութիւնը` Ատրպէյճանն առաջարկել է սահմանազատման հարցերով երկկողմ յանձնաժողովի յաջորդ նիստն անցկացնել ոչ թէ Նոյեմբերին, ինչպէս աւելի վաղ պայմանաւորուածութիւն էր ձեռք բերուել, այլ այս տարուայ Հոկտեմբերին», կ’ըսուի հաղորդագրութեան մէջ:
Ըստ Ատրպէյճանի ԱԳՆ-ի` Ճէյհուն Պայրամով ընդգծած է Ատրպէյճանի եւ Հայաստանի միջեւ միջպետական յարաբերութիւններու կարգաւորման ու խաղաղութեան պայմանագրի ստորագրման ուղղուած ջանքերուն կարեւորութիւնը: Այս ծիրին մէջ Ատրպէյճանի արտաքին գործերու նախարարը մանրամասն հայկական կողմին ուշադրութիւնը հրաւիրած է Ատրպէյճանի առաջարկած հինգ սկզբունքներուն վրայ հիմնուած (խաղաղութեան) պայմանագրի տարրերը, կ’ըսուի յայտարարութեան մէջ:
Բացի անկէ, կը փոխանցուի, որ Պայրամով ընդգծած է «Ատրպէյճանի տարածքէն հայկական զինուած ուժերու ամբողջական դուրսբերման անհրաժեշտութիւնը` համաձայն Ատրպէյճանի, Հայաստանի եւ Ռուսիոյ ղեկավարներու ստորագրած եռակողմ յայտարարութիւններուն, ճանապարհային ուղիներու բացումը հնարաւորինս սեղմ ժամկէտերու մէջ` փոխվարչապետներու նախագահութեամբ եռակողմ յանձնաժողովի շրջանակներուն մէջ ձեռք բերուած նախնական պայմանաւորուածութիւններու հիման վրայ»: