Հայաստանի մէջ Ռուսիոյ դեսպան Սերկէյ Քոփիրքինը այն կարծիքին է, որ զօրքերու ետքաշումը ելման դիրքեր միակ յուսալի հիմքը կրնայ ըլլալ` Հայաստանի եւ Ատրպէյճանի միջեւ առկայ խնդիրները լուծելու համար: Սերկէյ Քոփիրքինը նման կարծիք յայտնած է Գեղարքունիքի մարզի Սոթք համայնքին մէջ լրագրողներու հետ զրոյցին:
Ան նշեց, որ ռազմական բախումներու ճանապարհը չի կրնար յանգեցնել առկայ խնդիրներու լուծման: «Մենք կ’ելլենք անկէ, որ միայն քաղաքական, դիւանագիտական ջանքերը կրնան լուծման բերել», ըսաւ Քոփիրքին:
Ան յաւելեց, որ Ռուսիան իրմէ կախեալ ամէն ինչ կ’ընէ, որպէսզի քաղաքական կարգաւորման գործընթացը, որ գործարկուած է 2020 թուականի Նոյեմբեր 9-ի եռակողմ յայտարարութեամբ, շարունակուի` չնայած բոլոր խնդիրներուն եւ հակասութիւններուն: «Մենք կը շարունակենք աշխատիլ այդ ուղղութեամբ, կողմերուն կ’աջակցինք ընդհանուր մօտեցումներու հասնելու հարցով: Այդ հեշտ չէ, մեծ ջանքեր կը պահանջէ, բայց մենք այդ ըրած ենք եւ մտադիր ենք ընել հետագային եւս», նշեց Ռուսիոյ դեսպանը:
Անդրադառնալով Հայաստանին Ռուսիայէն զէնք մատակարարելու հարցին, Քոփիրքինը ընդգծեց, որ պատրաստ չէ մեկնաբանելու այդ թեման` հաշուի առնելով անոր զգայուն ըլլալը: «Այդ պէտք է ընեն արհեստավարժները, բայց այդ ոլորտ է, որ մեր դաշնակցային յարաբերութիւններու մասն է», ըսաւ դեսպանը: