Արցախի նախագահ Արայիկ Յարութիւնեան տեղեկացուցած է, որ ժամանած է Երեւան` Արցախի հարցով ՀՀ իշխանութիւններուն հետ քաղաքական խորհրդակցութիւններ ունենալու նպատակով:
«Յայտնում եմ, որ այդ նպատակով մասնակցել եմ ՀՀ Անվտանգութեան Խորհրդի նիստին: Տեղի ունեցած քննարկումներից յետոյ ցանկանում եմ մէկ անգամ եւս արձանագրել, որ այս փուլում Արցախի կարգավիճակի հետ կապուած որեւէ փաստաթուղթ չի քննարկւում:
ՀՀ մեր գործընկերներին ուղղուած իմ խօսքում բառացիօրէն փոխանցել եմ բոլորիս մտահոգութիւնները` ընդգծելով, որ ոչ մի փաստաթուղթ չի կարող ստորադասել մեր ժողովրդի ազատ եւ ինքնիշխան ապրելու իրաւունքն ու ձգտումները:
ՀՀ իշխանութիւնները վերահաստատել են, որ առանց Արցախի իշխանութիւնների հետ քննարկելու եւ մեր ժողովրդի կարծիքը հաշուի առնելու` Արցախին առնչուող որեւէ փաստաթուղթ չի ստորագրուելու:
Արցախի Ազգային Ժողովի պատուիրակութիւնը եւս, գտնուելով Երեւանում, շարունակելու է քաղաքական խորհրդակցութիւնները ՀՀ արտաքին գործերի նախարարի, ԱԺ նախագահի եւ քաղաքական դաշտի այլ դերակատարների հետ», Ֆէյսպուքի էջով գրած է Արցախի նախագահը:
