Հայաստանի յունահռոմէական ոճի ըմբշամարտի հաւաքականի անդամ, Ողիմպիական խաղերու ախոյեան Արթուր Ալեքսանեանը աշխարհի առաջնութեան քառակի ախոյեան է:
Սերպիայի մայրաքաղաք Պելկրատի մէջ ընթացող յունահռոմէական ոճի ըմբշամարտի աշխարհի առաջնութեան 97կգ քաշային կարգի եզրափակիչին Արթուր Ալեքսանեանը մրցեցաւ պուլկարացի Կիրիլ Միլենով Միլովի հետ: Հայ ըմբիշը յաղթանակ տօնեց 5:1 հաշուով:
Աշխարհի այս առաջնութեան Ալեքսանեանը մեկնարկած էր որակաւորման փուլէն, սակայն առաջին գօտեմարտի մրցակիցը հրաժարած էր պայքարէն: 1/8 եզրափակիչին Արթուր Ալեքսանեանը յաղթած էր աշխարհի կրկնակի ախոյեան, թուրք Մետեհան Պաշարին եւ դուրս եկած քառորդ եզրափակիչ, որտեղ ալ ուժերը չափելով Ղրղզստանէն Բեկսուլթան Մախմուդովի հետ` յաղթած էր 9:0 հաշուով: Կիսաեզրափակիչին Ողիմպիական խաղերու ախոյեանը կը մրցէր աշխարհի ներկայիս ախոյեան Մոհամադխադի Աբդուլահ Սարավիի հետ: Հայ ըմբիշը յաղթած էր 3:1 հաշուով:
Արթուր Ալեքսանեանը Ռիօ-2016-ի ոսկէ, Թոքիօ-2020-ի արծաթէ եւ Լոնտոն-2012-ի պրոնզէ մետալակիր է: Ալեքսանեան աշխարհի ախոյեան է դարձած 2014, 2015, 2017 թուականներուն: Ան երկու անգամ նուաճած է ԱԱ-ի արծաթէ մետալը (2013, 2019): Հայ ըմբիշը Եւրոպայի 5-ակի յաղթող (2012, 2013, 2014, 2018, 2020 թուականներ) եւ Եւրոպական խաղերու ախոյեան է: