2021 թուականի վարչական շրջանի ղեկավարի համար կայացուած քննութիւնը յանձնելէ եւ հարցազրոյցը յաջողութեամբ անցնելէ յետոյ, ազգութեամբ հայ Պերք Աճարը նշանակուած է Թուրքիոյ Տենիզլի նահանգի կազմին մէջ գտնուող Պապատաղ վարչական շրջանի ղեկավար եւ յառաջիկայ օրերուն պիտի անցնի պարտականութիւններու կատարման:
Այս մասին կը յայտնէ թրքական aynahaber.net-ը:
Պերք Աճարը առաջին հայն է, որ Թուրքիոյ Հանրապետութեան պատմութեան մէջ դարձած է վարչական շրջանի ղեկավար:
Պապատաղի արդէն նախկին ղեկավար Ատէմ Քարաթաշը Օգոստոս 16-ին պաշտօնապէս թողած է աշխատանքն ու հրաժեշտ տուած է շրջանին:
1995 թուականին Սթամպուլ ծնած Պերք Աճարը ուսանած է Սահակեան Նունեանի անուան հայկական միջնակարգ եւ «Լոյս» աւագ դպրոցները: 2020 թուականին աւարտած է Պիլկի համալսարանի իրաւաբանական բաժինը, փաստաբանական փորձառութիւնը կատարած է Շիշլի թաղամասին մէջ գործող փաստաբանական գրասենեակին մէջ: