Արցախի Հանրապետութեան նախագահ Արայիկ Յարութիւնեան Օգոստոս 15-ին ընդունած է Արցախեան երրորդ պատերազմին զոհուած եւ անհետ կորսուած զինուորներու հարազատներու միութեան խումբ մը անդամներ:
Քննարկուած են միութեան գործունէութեան առնչուող հարցեր, բարձրացուած հարցերու իրաւական կարգաւորումներու յստակացման նպատակով ընդգծուած է պետական համապատասխան կառոյցներու հետ համատեղ աշխատանքին կարեւորութիւնը:
Հանդիպման ընթացքին Արայիկ Յարութիւնեան անդրադարձած է նաեւ շփման գիծի վերջին սրացումներուն եւ Արցախի Հանրապետութիւն-Հայաստանի Հանրապետութիւն այլընտրանքային ճանապարհի խնդիրին, նշելով, որ խօսքը նոր միջանցքի մասին է, որուն պահպանութիւնը, համաձայն 2020 թուականի Նոյեմբեր 9-ի եռակողմ յայտարարութեան, պիտի իրականացնեն Արցախի մէջ տեղակայուած ռուս խաղաղապահները:
Հանդիպման ընթացքին նախագահ Յարութիւնեան պատասխանած է ներկաներուն շարք մը հարցումներուն եւս: