Home ՀԱՅԱՍՏԱՆ Որքա՞ն Է Հայաստանի Բնակչութեան Թիւը

Որքա՞ն Է Հայաստանի Բնակչութեան Թիւը

by MassisPost

Հայաստանի մէջ այս տարուան Յուլիս 1-ի դրութեամբ կը բնակի 2 միլիոն 961 հազար 900 մարդ: Անոնցմէ 1 միլիոն 564 հազար 500-ը կին են, 1 միլիոն 397 հազար 400-ը` տղամարդ: Քաղաքներուն մէջ կը բնակի 1 միլիոն 890 հազար 200 մարդ, իսկ գիւղերուն մէջ` 1 միլիոն 071 հազար 700 մարդ:

Ըստ ՀՀ Վիճակագրական Կոմիտէի տուեալներուն, բնակչութեան ընթացիկ հաշուառումը կ՛իրականացուի 2011 թուականի մարդահամարի հիմքով:

Հայաստանի մէջ 2022 թոականի Յունուար-Յունիսին, ծնածներու սեռերու յարաբերակցութեան գործակիցը կազմած է 111.3 տղայ` 100 աղջկայ հաշուով, նախորդ տարուան Յունուար-Յունիսին արձանագրուած 108.0-ի համեմատ: Հայաստանի մէջ 2022 թուականի Յունուար-Յունիսին արձանագրուած 1000 ամուսնութիւններու համեմատ արձանագրուած է ամուսնալուծութեան 278 դէպք` 2021 թուականի Յունուար-Յունիսին արձանագրուած ամուսնալուծութեան 246 դէպքի համեմատ:

2022 թուականի առաջին կիսամեակին արձանագրուած է 7 հազար 926 ամուսնութիւն եւ 2 հազար 207 ամուսնալուծութիւն: Ծնած է 16 հազար 511, մահացած` 14 հազար 679 մարդ. բնական յաւելաճը կազմած է 1832:

2022 թուականի տարեսկիզբի դրութեամբ ՀՀ մշտական բնակչութեան թուաքանակի 63.1 տոկոսը կազմած է աշխատունակ բնակչութիւնը (16-62 տարեկան), 21.4 տոկոսը` աշխատունակ տարիքէն ցած (0-15 տարեկան), իսկ 15.5 տոկոսը` աշխատունակ տարիքէն բարձր (63 եւ աւելի տարեկան) բնակչութիւնը: Հայաստանի 1000 աշխատունակ տարիքի բնակչութեան բաժին ինկած է անաշխատունակ տարիքի 585 մարդ (245 տարեց եւ 340 հոգի 0-15 տարեկան երեխայ):

ՀՀ վարչատարածքային բաժանման հիմքը «Հայաստանի Հանրապետութեան վարչատարածքային բաժանման մասին» եւ «Երեւան քաղաքին մէջ տեղական ինքնակառավարման մասին» օրէնքներն են, որոնց համաձայն ՀՀ տարածքը կը բաժնուի 10 մարզերու եւ Երեւան քաղաքի: Հայաստանի մէջ կայ 49 քաղաք եւ 953 գիւղ:

Հարակից Նյութեր

Leave a Comment