Ուզպեքստանի մէջ Օգոստոս 2-ին Թուրքիոյ, Ատրպէյճանի եւ Ուզպեքստանի արտաքին գործերու նախարարներուն եւ փոխադրութեան նախարարներուն հանդիպման ժամանակ Թուրքիոյ արտաքին գործերու նախարար Մեւլութ Չաւուշօղլուն անդրադարձած է Հայաստան-Թուրքիա ու Հայաստան-Ատրպէյճան բանակցութիւններուն:
«Կ’աջակցինք Ատրպէյճանի եւ Հայաստանի միջեւ հաղորդակցութիւններու ապաշրջափակման, սահմանազատման եւ խաղաղութեան պայմանագրի կնքման ուղղուած բանակցութիւններուն», նշած է Չաւուշօղլուն, յաւելած որէ Անգարան եւս քայլեր կը կատարէ յարաբերութիւններու բնականոնացման ուղղութեամբ:
«Յառաջ կը շարժինք յատուկ ներկայացուցիչներու հանդիպումներու եւ Ատրպէյճանի հետ խորհրդակցութիւններու միջոցով: Նոր կապուղիները, որոնց գործարկումը օրակարգին վրայ է, Միջին Ասիան, Հարաւային Կովկասը, Անատոլիան եւ եւրոպական տարածաշրջանը պիտի կապեն միմեանց եւ պիտի նպաստեն ամբողջ տարածաշրջանի բարեկեցութեան», եզրափակած է Թուրքիոյ արտաքին գործերու նախարարը:
