Մոսկուան չ’առարկեր արտատարածաշրջանային խաղցողներու ներգրաւման, եթէ անոնք կը գործեն առկայ եռակողմ յայտարարութիւններու շրջանակին մէջ եւ կը նպաստեն անոնց իրականացման: Այդ մասին ճեպազրոյցի ընթացքին ըսած է Ռուսիոյ Դաշնութեան Արտաքին Գործերու Նախարարութեան տեղեկատուութեան եւ մամուլի բաժանմունքի ղեկավարի տեղակալ Իւան Նեչաեւը` պատասխանելով հարցին, թէ Մոսկուան ինչպէ՞ս կը պատրաստուի դիմակայելու Հարաւային Կովկասի մէջ արեւմտեան ազդեցութեան:
«Ռուսիան հանդէս կու գայ Հարաւային Կովկասը խաղաղութեան եւ բարգաւաճման գօտիի վերածելու օգտին: Տարածաշրջանային ուղղութեամբ մեր աշխատանքին մէջ յառաջ կը քաշենք բացառապէս կառուցողական օրակարգ եւ չենք պատրաստուիր մրցակցելու ոեւէ մէկուն հետ: Ունինք կառուցողական նպատակներ: Ինչ կը վերաբերի Երեւանի եւ Պաքուի միջեւ յարաբերութիւններու կարգաւորման, բազմիցս նշած ենք, որ համապատասխան ջանքերը պէտք է գործադրուին Ռուսիոյ, Հայաստանի եւ Ատրպէյճանի ղեկավարներու` 2020 թուականի Նոյեմբեր 9-ի, 2021 թուականի Յունուար 11-ի եւ Նոյեմբեր 26-ի եռակողմ յայտարարութիւններու հիման վրայ:
Մենք դէմ չենք արտատարածաշրջանային խաղցողներու ներգրաւման, եթէ անոնք կը գործեն վերը նշուած համաձայնագրերուն համապատասխան եւ կը նպաստեն անոնց իրականացման: Կարեւոր է թոյլ չտալ կրկնօրինակում ու «թաքնուած խաղեր»` ինչ-որ մէկը թուլցնելու կամ գործը խոչընդոտելու համար: Ցաւօք, մենք բազմիցս հանդիպած ենք նշուած դերակատարներուն կողմէ նման գործելաոճի», ըսած է Նեչաեւը:
