Պաշտօնական այցով Վարշաւա գտնուող Հայաստանի Հանրապետութեան արտաքին գործերու նախարար Արարատ Միրզոյեանը հանդիպում ունեած է Լեհաստանի Հանրապետութեան Ծերակոյտի նախագահ Թոմաշ Կրոձքիի հետ:
Զրուցակիցները համակարծիք էին, որ խորհրդարանական ձեւաչափով սերտ համագործակցութիւնը կարեւոր դեր ունի հայ-լեհական միջպետական յարաբերութիւններու օրակարգը հարստացնելու եւ բարեկամական կապերը աւելի խորացնելու գործին մէջ: Այս առումով շեշտուած է տարբեր մակարդակներով աշխոյժ փոխայցելութիւններու եւ շփումներու պահպանման կարեւորութիւնը:
Արարատ Միրզոյեանը ներկայացուցած է Հայաստանի կառավարութեան կողմէ տեղի ունեցող բարեփոխումները` ուղղուած ժողովրդավարութեան ամրապնդման, մարդու իրաւունքներու պաշտպանութեան եւ իրաւունքի գերակայութեան ապահովման: Թոմաշ Կրոձքին նշած է, որ լիովին կ’աջակցին Հայաստանին` ժողովրդավարական յառաջընթացի ճանապարհին:
Հանդիպման ընթացքին ՀՀ արտաքին քաղաքական գերատեսչութեան ղեկավարը զրուցակցին ներկայացուցած է Լեռնային Ղարաբաղի հակամարտութեան գօտիին մէջ տիրող իրավիճակը եւ հայկական կողմին դիրքորոշումը` ԼՂ հիմնախնդիրի հանգուցալուծման եւ Ատրպէյճանի հետ յարաբերութիւններու կարգաւորման վերաբերեալ: Արարատ Միրզոյեան ընդգծած է, որ Ատրպէյճանի առաւելապաշտական հռետորաբանութիւնը կը խաթարէ տարածաշրջանային կայունութեան ու խաղաղութեան հաստատմանն ուղղուած ջանքերը:
Անդրադառնալով 44-օրեայ պատերազմին հետեւանքով յառաջացած մարդասիրական խնդիրներուն` նախարար Միրզոյեան շեշտած է Ատրպէյճանի մէջ ապօրինաբար պահուող հայ ռազմագերիներու եւ քաղաքացիական անձերու անյապաղ ազատ արձակման եւ հայրենադարձման, ինչպէս նաեւ ատրպէյճանական վերահսկողութեան տակ անցած տարածքներուն մէջ հայկական պատմամշակութային եւ կրօնական ժառանգութեան պաշտպանութեան անհրաժեշտութիւնը:
Ընդգծուած է, որ Լեռնային Ղարաբաղի հակամարտութիւնը պէտք է իր լուծումը գտնէ խաղաղ ճանապարհով` բանակցութիւններու սեղանին շուրջ:
Թոմաշ Կրոձքին պատրաստակամութիւն յայտնած է` աջակցելու խաղաղութեան հասնելու ջանքերուն: