Արցախի մէջ Հայաստանէն զօրակոչուած ժամկէտային զինուորներ պիտի չըլլան, իսկ պատերազմի ընթացքին Պաշտպանութեան բանակին օգնելու համար Արցախ գացած ստորաբաժանումներու` Հայաստան վերադառնալու գործընթացը պիտի աւարտի Սեպտեմբերին, «Արմենփրես»ին տուած հարցազրոյցին յայտարարած է Հայաստանի Անվտանգութեան Խորհուրդի քարտուղար Արմէն Գրիգորեանը:
«Հրադադարի հաստատումից եւ Ղարաբաղում Ռուսաստանի խաղաղապահների տեղակայումից յետոյ Հայաստանի Զինուած Ուժերի ստորաբաժանումների դուրսբերումը Ղարաբաղից տրամաբանական է: Ինչ վերաբերում է Պաշտպանութեան բանակին, այն Լեռնային Ղարաբաղում է եղել եւ շարունակում է այնտեղ մնալ», նշած է ան:
Արմէն Գրիգորեան աւելցուցած է, որ այնուամենայնիւ, Հայաստանէն Պաշտպանութեան բանակ պայմանագրայիններ չեն զօրակոչուիր, Լեռնային Ղարաբաղը կը կազմակերպէ պայմանագրայիններու ներգրաւումը:
Անվտանգութեան Խորհուրդի քարտուղարը պնդած է, որ անվտանգութեան առումով ոչինչ պիտի փոխուի Արցախի մէջ, որովհետեւ այնտեղ նախապէս ալ անվտանգութեան ապահովման գործը եղած է Պաշտպանութեան բանակի ուսերուն: Ապա յաւելած է, որ Լեռնային Ղարաբաղին մէջ Ռուսիոյ Դաշնութեան խաղաղապահ ուժերու տեղակայումը անվտանգութեան երաշխիք պիտի ըլլայ:
Դիտարկմանը, թէ Մարտին ռուս խաղաղապահներու ներկայութեամբ ատրպէյճանական ուժերու յառաջխաղացումը Փառուխի ուղղութեամբ ցոյց տուաւ, որ այդ այդպէս չէ, պաշտօնեան արձագանգած է. «Փառուխի դէպքերը 2020 թուականի Նոյեմբերի 9-ի յայտարարութեան կոպիտ խախտում են: Ռուսաստանի Դաշնութիւնը մեզ հաւաստիացրել է, որ ներխուժած ատրպէյճանական ուժերը պէտք է դուրս գան այնտեղից, եւ մենք յոյս ունենք, որ խաղաղապահ ուժերը կ’ապահովեն ապօրինի ներխուժած ստորաբաժանումների դուրսբերումը խաղաղապահ ուժերի պատասխանատուութեան գօտուց»:
Արմէն Գրիգորեանի` Ղարաբաղի զօրակոչի թեմայով հարցազրոյցը կը յաջորդէ անցեալ շաբթուան վերջը Ատրպէյճանի նախագահի ծաւալուն ելոյթին, ուր ան յայտարարած էր, որ 44-օրեայ պատերազմէն աւելի քան1.5 տարի անց Հայաստանը դեռ չէ կատարած ստանձնած պարտաւորութիւնները, մինչդեռ Ռուսիոյ Պաշտպանութեան նախարարութեան ներկայացուցիչը Պաքուի մէջ խոստացած էր, որ հայկական զօրքերը մինչեւ Յունիս դուրս պիտի բերուին Ղարաբաղէն:
«Հայաստանը` որպէս պատերազմը պարտուած կողմ, պարտաւորութիւններ ստանձնած է, որոնք յստակ ամրագրուած են Նոյեմբերի 10-ի յայտարարութեամբ: Անոնցմէ մէկը հայկական զինուած ուժերու դուրսբերումն է Ղարաբաղէն: Սակայն մինչ օրս այդ չէ իրագործուած: Մենք բազմիցս բարձրացուցած ենք այս հարցը, սակայն Հայաստանը կը ձգձգէ», ըսած էր Ալիեւ:
