Հայաստանի Հանրապետութեան վարչապետ Նիկոլ Փաշինեան շնորհաւորական ուղերձ յղած է Սահմանադրութեան օրուան առիթով: Ուղերձին մէջ, մասնաւորապէս, ըսուած է.
«Սիրելի հայրենակիցներ,
Սիրելի ժողովուրդ,
Այսօր Հայաստանի Հանրապետութիւնում նշւում է Սահմանադրութեան օրը, ինչի կապակցութեամբ շնորհաւորում եմ բոլորիս: Մեր Սահմանադրութեան ոչ փոփոխելի յօդուածները ձեւակերպել են Հայաստանի Հանրապետութեան ազգային-պետական տեսլականը:
Ըստ այդմ` Հայաստանի Հանրապետութիւնն ինքնիշխան, ժողովրդավարական, ընկերային, իրաւական պետութիւն է:
Հայաստանի Հանրապետութիւնում իշխանութիւնը պատկանում է ժողովրդին: Ժողովուրդն իր իշխանութիւնն իրականացնում է ազատ ընտրութիւնների, հանրաքուէների, ինչպէս նաեւ Սահմանադրութեամբ նախատեuուած պետական եւ տեղական ինքնակառավարման մարմինների ու պաշտօնատար անձանց միջոցով:
Հպարտութեամբ պիտի արձանագրեմ, որ 2018 թուականի ոչ-բռնի, թաւշեայ, ժողովրդական յեղափոխութիւնից յետոյ Հայաստանը միջազգայնօրէն ճանաչուած է որպէս ժողովրդավարական պետութիւն: Իշխանութիւնը ժողովրդին պատկանելու նպատակն իրագործուած է, եւ մեր մեծագոյն խնդիրն է Հայաստանի Հանրապետութեան ժողովրդավարութիւնը վերածել երկրի անվտանգութիւնն ապահովող տեւական գործօնի:
Պիտի արձանագրեմ նաեւ, որ սահմանադրական միւս հիմնարար նպատակներն ամրագրելու ճանապարհին մեծ աշխատանք ունենք անելու, եւ մեր կառավարութեան կողմից իրականացուող բարեփոխումներն ուղղուած են հէնց այդ նպատակներին:
Սահմանադրութեան օրուայ առիթով պիտի առանձնայատուկ ընդգծեմ ՀՀ Սահմանադրութեան յօդուած 3-ի դրոյթները, համաձայն որի` մարդու անօտարելի արժանապատուութիւնն իր իրաւունքների եւ ազատութիւնների անքակտելի հիմքն է: Պիտի ցաւով արձանագրեմ, որ ժողովրդավարութիւնը, խօսքի, կարծիք արտայայտելու ազատութիւնը երբեմն յանգեցնում է ատելութեան խօսքի, հայհոյախօսութեան, մարդու արժանապատուութիւնը նուաստացնող խօսոյթի:
Ամուր իրաւակարգը, անկախ դատական համակարգը, օրինականութեան մեխանիզմները պիտի դառնան նաեւ մարդու արժանապատուութեան պաշտպանութեան յուսալի երաշխիքներ` առանց սահմանափակելու եւ վնասելու ժողովրդավարական արժէքները, եւ այս հարցի լուծումը մեր օրակարգի առաջնահերթութիւնների շարքում է:
Սիրելի հայրենակիցներ,
Տեղեակ էք անշուշտ, որ ձեւաւորուել է Սահմանադրական Բարեփոխումների Խորհուրդը եւ մասնագիտական յանձնաժողովը ու մինչեւ տարեվերջ պէտք է ներկայացուի սահմանադրական բարեփոխումների հայեցակարգի նախագիծ:
Ակնյայտ համարելով, որ Սահմանադրութիւնը մշտապէս զարգանալու, բարելաւելու կարիք ունի, միեւնոյն ժամանակ պիտի ընդգծեմ համոզմունքս, որ Հայաստանը պիտի շարունակի պահպանել կառավարման խորհրդարանական համակարգը, որովհետեւ 2021 թուականի իրադարձութիւններն ապացուցեցին, որ այս համակարգը ճգնաժամեր կառավարելու, քաղաքական բանավէճին ժողովրդի ներգրաւման ու վճռական մասնակցութեան աւելի գործուն մեխանիզմներ է ապահովում:
Կրկին շնորհաւորում եմ բոլորիս Հայաստանի Հանրապետութեան Սահմանադրութեան օրուայ առիթով: Ցանկանում եմ, որ իրաւունքը, օրէնքը դառնայ մեր հանրային, քաղաքացիական յարաբերութիւնների կարգաւորման եթէ ոչ միակ, առնուազն առանցքային եւ վճռական գործօն»:
