Home ԳԼԽԱՒՈՐ ԼՈՒՐԵՐ ԱԺ-ն Իշխան Սաղաթէլեանն Ու Վահէ Յակոբեանը Հեռացուց Փոխնախագահի Եւ Յանձնաժողովի Նախագահի Պաշտօններէն

ԱԺ-ն Իշխան Սաղաթէլեանն Ու Վահէ Յակոբեանը Հեռացուց Փոխնախագահի Եւ Յանձնաժողովի Նախագահի Պաշտօններէն

by MassisPost

ՀՀ Ազգային Ժողովը ԱԺ «Հայաստան» խմբակցութեան պատգամաւոր Իշխան Սաղաթէլեանը ետ կանչեց ԱԺ նախագահի տեղակալի պաշտօնէն, նաեւ դադրեցուց Վահէ Յակոբեանի լիազօրութիւնները` որպէս Տնտեսական հարցերու մշտական յանձնաժողովի նախագահ:

ԱԺ արտահերթ նիստին ինչպէս այդ հարցերու քննարկման, այնպէս ալ քուէարկութեան չեն մասնակցած երկու ընդդիմադիր խմբակցութիւններու պատգամաւորը:

ԱԺ «Հայաստան» խմբակցութեան պատգամաւոր Իշխան Սաղաթէլեանե ԱԺ նախագահի տեղակալի պաշտօնէն ետ կանչելու վերաբերեալ եւ պատգամաւոր Վահէ Յակոբեանի` որպէս Տնտեսական հարցերու մշտական յանձնաժողովի նախագահի լիազօրութիւններու դադրեցման մասին որոշման նախագիծերու հարցով փակ, գաղտնի քուէարկութեան արդիւնքները յայտնեց Հաշուիչ Յանձնախումբի նախագահ Նարեկ Պապայեանը, 107 պատգամաւորներէն քուէարկութեան մասնակցած է 66 պատգամաւոր, որոնք բոլորը երկու պարագաներուն ալ կողմ քուէարկած էին:

Նախագիծերը ներկայացուցած էր «Քաղաքացիական Պայմանագիր» խմբակցութիւնը:

ՔՊ խմբակցութեան պատգամաւոր Արուսեակ Ջուլհակեանը, հիմնաւորելով ընդդիմադիրները պաշտօններէն հեռացնելու իրենց նախաձեռնութիւնը,  մասնաւորապէս նշած էր, որ Իշխան Սաղաթէլեանը ձախողած է կատարել ԱԺ փոխնախագահի իր լիազօրութիւնները: Իշխան Սաղաթէլեանը 2022 թուականի Յունուար 17-էն Յունիս 29 ներառեալ, այսինքն` 2022 թուականի առաջին օրացոյցային կիսամեակի նիստերու թիւով 342 քուէարկութիւններէն ունեցած է 198 բացակայ: 8-րդ գումարման ԱԺ Խորհուրդը իր ձեւաւորման պահէն գումարած է թիւով 25 նիստ, Իշխան Սաղաթէլեանը միայն 7-ին ներկայ եղած է: «Այսպիսով, թէ՛ ԱԺ լիագումար նիստերից, թէ՛ Խորհրդի նիստերից յաճախակի բացակայութիւնների պատճառով Իշխան Սաղաթէլեանը չի կատարել իր անմիջական պարտականութիւնները», նշած էր Ջուլհակեանը:

Տնտեսական հարցերու մշտական յանձնաժողովի անդամ Ծովինար Վարդանեանը, հիմնաւորելով  Վահէ Յակոբեանի` որպէս Տնտեսական հարցերու մշտական յանձնաժողովի նախագահի լիազօրութիւններու դադրեցման իրենց նախաձեռնութիւնը, նշած էր, որ 8-րդ գումարման առաջին օրացոյցային կիսամեակի ընդհանուր 342 քուէարկութիւններէն Վահէ Յակոբեանը չէ մասնակցած 194-ին, ԱԺ 8-րդ գումարման ընթացքին հրաւիրուած 25 Խորհուրդի նիստերէն բացակայած է 20 անգամ: ԱԺ-ն 8-րդ գումարման ընթացքին ընդունած է 253 օրէնք, որոնցմէ 83-ին համար գլխադասային եղած է Տնտեսական հարցերու մշտական յանձնաժողովը: ԱԺ 8-րդ գումարման ընթացքին ԱԺ տնտեսական հարցերու մշտական յանձնաժողովը կազմակերպած է 27 հերթական եւ արտահերթ նիստեր, նախագահ Վահէ Յակոբեանը նիստերու նախապատրաստման, կազմակերպման աշխատանքներուն չէ մասնակցած, չէ նախագահած թիւով 11 նիստ: Քարտուղարութեան յանձնուող վերոնշեալ թիւով նիստերու օրակարգերը եւ արձանագրութիւնները անոր կողմէ չեն ստորագրուած, յանձնաժողովի ընդունարանը պարբերաբար փակ եղած է, իսկ զանգերը մնացած են անպատասխան:

Իշխանական պատգամաւորները յայտնած էին, որ ՔՊ-ն հետագային մտադիր է ԱԺ փոխնախագահ եւ Տնտեսական հարցերու մշտական յանձնաժողովի նախագահ ընտրել ընդդիմադիրներ, որոնք յաւուր պատշաճի կը կատարեն իրենց պարտականութիւնները:

Հարակից Նյութեր

Leave a Comment