Ոստիկանութեան պետի տեղակալ Արա Ֆիտանեանը անդրադարձաւ ընդդիմութեան գործողութեան մասնակիցներուն եւ ոստիկաններուն միջեւ բախման:
Ան ըսաւ, որ գործողութեան մասնակիցները քորոցներով կը ծակեն կարմիր պերեթաւորները: Ֆիտանեան նշեց, որ ոստիկանութեան բոլոր ծառայողներուն գործունէութիւնը դրական կը գնահատէ: «Սադրանքներն անչափ շատ են, գալիս են, քորոցներով աննկատ ծակում են կարմիր պերեթաւորներին, դա բնակա՞ն է: Պարբերաբար այդպիսի բան է լինում: Դրանից յետոյ կարմիր պերեթաւոր լինի, թէ այլ ծառայող, կը կարողանա՞յ իրեն տիրապետել», նշեց ան:
«Եղել են համաչափ գործողութիւններ: Տուեալ պահին ոստիկանութիւնն իրականացրել է այն գործողութիւնները, որոնք անհրաժեշտ են եղել հէնց տուեալ պահով պայմանաւորուած: Դուք կարծում էք, որ այդ հաւաքը խաղաղ բնո՞յթ էր կրում: Ակնյայտ է, որ այնտեղ եղել են թէ քարեր, ունենք տեսարաններ, երբ այլ առարկաներ եւս նետուել են: Եւ սկիզբը դրուել է հէնց հաւաքի մասնակիցների կողմից: Հետեւաբար, երբ սկսւում են նման գործընթացներ, արդէն խաղաղից անցնում են ոչ-խաղաղ բնոյթի: Եւ այս դէպքում, այո՛, ոստիկանութիւնը կարող է կիրառել ցանկացած միջոց` օրէնքի շրջանակներում»:
Ըստ Ֆիտանեանի` այն անձերուն նկատմամբ, որոնք կը կասկածուին այդ գործողութիւններուն մէջ, համապատասխան իրաւական գործընթացներ սկսած են: Ըստ Ֆիտանեանի` գործողութիւնները ղեկավարող պատգամաւորները կը կարծեն, որ կրնան անարգել մտնել որեւէ կառավարական շէնք, բայց կը սխալին:
«Այդպէս չէ, Պատգամաւորի գործունէութեան երաշխիքների մասին օրէնքի 6-րդ յօդուածում ասւում է` Ազգային Ժողովի պատգամաւորները կարող են հանդիպում պահանջել պետական կառավարման մարմինների ներկայացուցիչների հետ, եւ նախարարը, նախարարութեան ներկայացուցիչը պարտաւոր է հնարաւորինս սեղմ ժամկէտում ընդունել պատգամաւորին: Սա նշանակում է, որ նախ պատգամաւորը պէտք է ունենայ համաձայնութիւն տուեալ նախարարի հետ, հնարաւորինս սեղմ ժամկէտ եզրոյթը պէտք չէ նոյնականացնենք անյապաղ զրոյցի հետ: Այսինքն` պատգամնաւորներն անցնում են իրենց լիազօրութիւնները», նշեց փոխոստիկանապետը: