ՀՀ փոխոստիկանապետ Վարդան Մովսիսեանը, Ազգային Ժողովին մէջ լրագրողներու հետ ճեպազրոյցին, անդրադառնալով ոստիկանութեան ներկայացուցիչներուն տրուած պարգեւավճարներուն, նշեց, որ այդ օրէնքին համապատասխան գործողութիւն է:
«Պարգեւավճարի հետ միասին ոստիկանի միջին աշխատավարձը կազմում է 215 հազար դրամ: Դա աշխատանքային գործընթաց է, տարուայ մէջ կարող են լինել պարգեւատրումներ: Ոստիկանները պարգեւատրուել են Մայիսին, մօտ 2,5 միլիառ դրամի չափով, պարգեւատրուել են ՀՀ ոստիկանութեան բոլոր աշխատակիցները», յայտնեց ան:
Անդրադառնալով այն խօսակցութիւններուն, որ մարզերէն այս օրերուն ոստիկաններ կը բերուին մայրաքաղաք, փոխոստիկանապետը ըսաւ, որ այդ կը կատարուի հասարակական կարգը պահելու համար, քանի որ Երեւանի մէջ ցոյցեր կ’ընթանան:
Դիտարկմանը, թէ ոստիկանները անհամաչափ ուժ կը կիրառեն, նոյնիսկ անչափահասներու նկատմամբ, Մովսիսեան նշեց, որ այդ իրենք (ընդդիմադիրները) կ’ըսեն, թէ բիրտ ուժ է. «Ոստիկանները մարդկանցը բերման են ենթարկում: Իսկ անչափահասների մասով մի հարց տամ. ի՞նչ գործ ունի այնտեղ անչափահասը: Անչափահասին, ում տեղափոխել էին հիւանդանոց, ոչ մի լուրջ բան չի եղել, ես անձամբ եմ հետաքրքրուել, հիւանդանոցում առաջին օգնութիւն է ցուցաբերուել: 6 ոստիկան է տեղափոխուել հիւանդանոց եւ 5 քաղաքացի: Ոստիկաններից մէկի մօտ կայ կողերի կոտրուածք»:
Յիշեցնենք, որ Երկուշաբթի կառավարութեան 3-րդ մասնաշէնքը գրոհելու փորձի արդիւնքով ձերբակալուած է Սիւնիքի նախկին մարզպետ Սուրիկ Խաչատրեանի որդին` Տիգրան Խաչատրեանը:
Ոստիկանութեան պաշտօնական տուեալներուն համաձայն` Կառավարութեան 3-րդ մասնաշէնքի տարածքէն բերման ենթարկուած էր 111 քաղաքացի` խուլիկանութեան կասկածանքով: Քննչական Կոմիտէն հաղորդագրութիւն տարածեց` յայտնելով, որ Կառավարութեան 3-րդ մասնաշէնքին մօտ տեղի ունեցած գործողութիւններուն վերաբերեալ քրէական գործ յարուցուած է` զանգուածային անկարգութիւններու յատկանիշներով, որու շրջանակներուն մէջ ձերբակալուած է 8 անձ` զանգուածային անկարգութիւններու մասնակցելու կասկածանքով: Ձերբակալուածներու շարքին է նաեւ ՀՀ երրորդ նախագահ Սերժ Սարգսեանի եղբօր` Ալեքսանտր Սարգսեանի որդին` Հայկ Սարգսեանը: Անոր մեղադրանք առաջադրուած է ՀՀ Քրէական Օրէնսգիրքի 258-րդ յօդուածի առաջին մասով (խուլիկանութիւն):
