Հայաստանի տարածքին միջանցքային տրամաբանութեան ճանապարհ կամ փոխադրութեան ուղի չի կրնար գործել, արձագանգելով Ատրպէյճանի նախագահ Իլհամ Ալիեւի յայտարարութեան, ըսած է Հայաստանի Անվտանգութեան Խորհուրդի քարտուղար Արմէն Գրիգորեանը` շեշտելով, որ Հայաստանի դիրքորոշումները որեւէ փոփոխութիւն չեն կրած:
«Բոլոր պայմանաւորուածութիւնները, որ ձեռք են բերուել Պրիւքսէլում, վերաբերւում են տարածաշրջանային հաղորդակցութիւնների բացմանը: Պրիւքսէլում ձեռք բերուած բոլոր պայմանաւորուածութիւնները տեղաւորւում են նախկինում Հայաստանի ներկայացուցիչների արած հրապարակային յայտարարութիւնների շրջանակում: Տարածաշրջանային հաղորդակցութիւնների բացման ծիրին մէջ պայմանաւորուածութիւնները վերաբերուել են սահմանային, մաքսային հսկողութեան, ճանապարհային վճարների գանձման, միջազգային տարանցման կազմակերպման հարցերին: Սրանք կարեւոր հարցեր են «Հայկական Խաչմերուկ» նախագծի իրագործման համար եւ Հայաստանի կառավարութիւնը հետեւողականօրէն շարժուելու է այս ուղղութեամբ», ըսած է Հայաստանի ԱԽ քարտուղարը: