Արցախի Հանրապետութեան իշխանութիւններուն վերաբերմունքը տարբեր ձեւաչափերով ընթացող բանակցութիւններուն եւ քննարկումներուն մէջ Արցախի Հանրապետութեան ու Արցախի ժողովուրդի ճակատագրին վերաբերեալ հնչեցուող յայտարարութիւններուն միանշանակ է եւ արտայայտուած է քանի մը անգամ` նախագահին ու Ազգային Ժողովին կողմէ:
Այս մասին ըսած է Արցախի Հանրապետութեան նախագահի մամուլի քարտուղար Լուսինէ Աւանեսեանը` աւելցնելով, որ կը փափաքի յիշեցնել 2021 թուականի Դեկտեմբերին նախագահ Յարութիւնեանի հրապարակած դրոյթներէն քանի մը հատը.
Արցախահայութեան ինքնորոշման իրաւունքի լիարժէք ճանաչումը որեւէ վերապահման եւ զիջման ենթակայ չէ: Այդ հարցին բացառիկ տէրը Արցախի ժողովուրդն է:
Արցախի Հանրապետութեան անկախութեան միջազգային ճանաչումը իշխանութիւններուն ուղենիշը կը մնայ: Ատրպէյճանի կազմին մէջ որեւէ կարգավիճակ անընդունելի է:
Ոչ միայն կարգավիճակի, այլեւ ժողովրդագրական առումով վերադարձը անցեալին անընդունելի է: Արցախի Հանրապետութիւնը ունի իր տարածքային ամբողջականութիւնը վերականգնելու խնդիր:
Արցախի նախագահի խօսնակին խօսքով` իր քաղաքականութիւնը Արցախի իշխանութիւնը կը կառուցէ ու կ’իրականացնէ Արցախի Հանրապետութեան անկախութեան հռչակագրին եւ Մայր օրէնքին համապատասխան` համագործակցելով բոլոր գործընկերներուն հետ:
