ՀՀ արտաքին գործերու նախարար Արարատ Միրզոյեանն ու Եւրոպական Խորհրդարանի փոխնախագահ Էւա Քոփաչը քննարկած են տարածաշրջանային անվտանգութեան խնդիրներ: Միրզոյեանը ներկայացուցած է Հայաստանի դիրքորոշումը` տարածաշրջանային խաղաղութեան ու կայունութեան հաստատման ուղղուած քայլերուն եւ Լեռնային Ղարաբաղի հակամարտութեան կարգաւորման վերաբերեալ:
Արարատ Միրզոյեան ընդգծած է 44-օրեայ պատերազմին հետեւանքով յառաջացած մարդասիրական խնդիրներու լուծման կարեւորութիւնը, մասնաւորապէս` Ատրպէյճանի կողմէ պահուող հայ ռազմագերիներու եւ քաղաքացիական անձերու վերադարձման, Ատրպէյճանի վերահսկողութեան տակ անցած տարածքներուն մէջ հայկական մշակութային եւ կրօնական ժառանգութեան պահպանման անհրաժեշտութիւնը:
Հանդիպման ընթացքին Արարատ Միրզոյեանը ներկայացուցած է նաեւ Հայաստան-Թուրքիա կարգաւորման գործընթացի վերջին զարգացումները:
Նախարարը Պրիւքսէլ կը գտնուի մասնակցելու Հայաստան-ԵՄ Գործընկերութեան Խորհուրդի 4-րդ նիստին:
