Մոսկուան շահագրգռուած է, որ Հարաւային Կովկասը վերածուի խաղաղութեան, կայուն զարգացման եւ բարգաւաճման գօտիի, այս մասին ռուսական աղբիւրներու փոխանցմամբ` Տուշանպէի մէջ յայտնածէ Ռուսիոյ արտաքին գործերու նախարար Սերկէյ Լաւրովը, Հայաստանի եւ Ատրպէյճանի արտաքին գործերու նախարարներուն մասնակցութեամբ եռակողմ հանդիպման ընթացքին:
Նախարար Լաւրովի խօսքով` Մոսկուան շահագրգռուած է կողմերուն միջեւ վստահութեան մեծացմամբ եւ հայ-ատրպէյճանական լիարժէք յարաբերութիւններու կարգաւորման համար պայմաններու ստեղծմամբ: «Յոյսով եմ, որ այսօրուայ հանդիպումը հնարաւորութիւն պիտի տայ յառաջ ընթանալ այն ճանապարհով, որ նախանշած են մեր ղեկավարները», ըսած է ան:
Ատրպէյճանի արտաքին գործերու նախարար Ճէյհուն Պայրամովը, իր հերթին, նշած է, որ հանդիպումը «լաւ հնարաւորութիւն է` քննարկելու յառաջընթացը, որուն հնարաւոր է հասնիլ»: Ան միեւնոյն ժամանակ ափսոսանք յայտնած է, որ «տակաւին չեն յաջողած յառաջընթացի հասնիլ ճանապարհային հաղորդակցութիւններու բացման ուղղուած աշխատանքներուն մէջ»:
«Գիտեմ, որ գործընկերներուն միջեւ շփումները կը շարունակուին: Կը կարծենք, որ կայ լաւ հեռանկար, լաւ հնարաւորութիւն արդիւնքի հասնելու եւ եռակողմ յայտարարութիւնները ամբողջութեամբ իրականացնելու համար», ըսած է ատրպէյճանցի պաշտօնեան: Ան յաւելած է, որ վերջին շրջանին բաւականին սերտ շփումներ ունեցած են պետական սահմանի սահմանազատման գործընթացի մեկնարկին ուղղութեամբ:
«Կը կարծեմ, որ լաւ զարգացումներ, ըմբռնում կայ սահմանազատման հարցերու յանձնաժողովին մէջ կողմերու կազմին եւ ներկայացուցչականութեան առումով, նաեւ կը կարծեմ, որ մօտ ապագային հնարաւոր պիտի ըլլայ առնուազն սկսիլ այս գործընթացը», ըսած է Ատրպէյճանի արտաքին գործերու նախարարը:
Նախարար Արարատ Միրզոյեանը հանդիպման մեկնարկին շեշտած է, որ Հայաստանը եղած է եւ կը շարունակէ հաւատարիմ մնալ երեք երկիրներու ղեկավարներուն միջեւ բոլոր պայմանաւորուածութիւններու եւ յայտարարութիւններու իրականացման:
«Մենք պատրաստ ենք շարունակել բոլոր աշխատանքները ներկայիս ձեւաչափերի ուղղութեամբ․ տարածաշրջանում տնտեսական ենթակառուցուածքների հաղորդակցութիւնների բացման եւ խաղաղութեան պայմանագրի կամ, ինչպէս երեւի աւելի ճիշդ է ասել, յարաբերութիւնների կարգաւորման համաձայնագրի, յարաբերութիւնների հաստատման ու մնացեալ բոլոր խնդիրների լուծման ուղղութամբ, այդ թւում` մարդասիրական, ռազմագերիների ազատ արձակման եւ այլ խնդիրների, որոնք մնում են չլուծուած», յայտնած է Հայաստանի դիւանագիտութեան ղեկավարը: