Վիեննայի մէջ հանդիպած են Հայաստանի եւ Թուրքիոյ միջեւ յարաբերութիւններու կարգաւորման գործընթացի յատուկ ներկայացուցիչներ Ռուբէն Ռուբինեանը եւ Սերտար Քըլըճը:
Հայ եւ թուրք բանագնացները վերահաստատած են այս գործընթացին միջոցով երկու երկիրներուն միջեւ լիարժէք կարգաւորման հասնելու նպատակը, կը յայտնէ Հայաստանի Արտաքին Գործերու Նախարարութիւնը: Թրքական կողմը եւս նոյն բովանդակութեան հաղորդագրութեամբ հանդէս եկած է:
«Այս առնչութեամբ նրանք ունեցել են յստակ տեսակէտների անկեղծ ու արդիւնաւէտ փոխանակում եւ քննարկել հնարաւոր քայլերը, որոնք կարող են ձեռնարկուել այս ուղղութեամբ շօշափելի յառաջընթացի հասնելու համար: Նրանք վերահաստատել են իրենց համաձայնութիւնը` շարունակելու գործընթացը առանց նախապայմանների», ըսուած է հաղորդագրութեան մէջ:
Այս հանդիպումը արդէն երրորդն է հայ-թրքական յարաբերութիւններու հարցով յատուկ բանագնացներու նշանակումէն ի վեր: Ռուբէն Ռուբինեանը եւ Սերտար Քըլըճը առաջին անգամ հանդիպած էին Յունուարին՝ Մոսկուայի մէջ, այնուհետեւ` Փետրուարին՝ Վիեննայի մէջ: Երկու հանդիպումներու արդիւնքով բանագնացները պայմանաւորուած էին շարունակել գործընթացը` առանց նախապայմաններու:
Ու չնայած թրքական կողմը կը պնդէ, որ եկած է բանակցութիւնները Երեւան ու Անգարա տեղափոխելու ժամանակը, այս հանդիպումը եւս, հայկական կողմին առաջարկով, երրորդ երկրի մէջ կայացաւ: