Հայաստանի ու Չինաստանի արտաքին գործերու նախարարները պատրաստակամութիւն յայտնած են վճռականօրէն սերտացնելու եւ խորացնելու հայ-չինական յարաբերութիւնները, կը յայտնէ Հայաստանի արտաքին քաղաքական գերատեսչութիւնը` նշելով, որ Արարատ Միրզոյեանը հեռախօսազրոյց ունեցած է Վանկ Եիի հետ:
Կարեւորուած է տնտեսական համագործակցութեան բնագաւառին մէջ առկայ մեծ ներուժի օգտագործումը, ներդրումներու խրախուսումը, ենթակառուցուածքներու զարգացումը եւ լոճիսթիք մարտահրաւէրներու յաղթահարումը: Այս ծիրին մէջ շեշտուած է տարածաշրջանի ճանապարհային եւ տնտեսական ենթակառուցուածքներու ապաշրջափակման գործընթացին անհրաժեշտութիւնը:
Ներկայացնելով հայկական կողմին դիրքորոշումը տարածաշրջանին մէջ խաղաղութեան եւ կայունութեան հաստատման վերաբերեալ, Արարատ Միրզոյեանը ընդգծած է Հայաստանի եւ Ատրպէյճանի միջեւ տարբեր ուղղութիւններով բանակցութիւններու նշանակութիւնը, ինչպէս նաեւ Լեռնային Ղարաբաղի հակամարտութեան կարգաւորման գործին մէջ ԵԱՀԿ Մինսքի Խմբակի համանախագահութեան դերը: Երկուստեք կարեւորուած է միջազգայնօրէն ընդունուած առկայ բանակցային ձեւաչափի կենսունակութիւնը եւ խաղաղութեան գործընթացի յառաջմղումը:
Զրուցակիցները նաեւ միտքեր փոխանակած են տարածաշրջանային ու միջազգային օրակարգի` փոխադարձ հետաքրքրութիւն ներկայացնող հարցերու շուրջ:
